సీనియర్‌ నటిగా, స్టార్‌ హీరోయిన్‌గా కాజల్‌ తనదైన సత్తా చాటుతోంది. ఎంతమంది కొత్త భామలున్నా ఆమె అవకాశాలు ఆమెకే ఉన్నాయి. తమిళ, తెలుగు భాషల్లో కాజల్‌ స్థానం స్టాండర్డ్‌గా కొనసాగుతోంది. వయసుతో పాటు, కాజల్‌కి గ్లామర్‌ కూడా అంచెలంచెలుగా పెరుగుతూ వస్తోంది. ఈ విషయాన్ని మరింత బలంగా చెప్పేందుకు కాజల్‌ ఈ మధ్య గ్లామర్‌పై కాస్త ఎక్కువ ఫోకసే పెట్టింది. స్పెషల్‌ ఫోటో షూట్స్‌తో రెచ్చిపోతోంది. ఇదిలా ఉంటే, హీరోయిన్‌ సెంట్రిక్‌ మూవీస్‌ కన్నా, కమర్షియల్‌ మూవీసే తనకు ఎక్కువ ఇష్టమని గతంలో కాజల్‌ చెప్పుకొచ్చింది. అలా అని ఆ పాత్రలు చేయనని చెప్పలేదు కానీ, దేనికైనా ఓ టైం రావాలి అని సెలవిచ్చింది చందమామ. ఆ టైం వచ్చినట్లే అనిపిస్తోంది. ఇప్పటికే, తన సహనటి అయిన సమంత హీరోయిన్‌ సెంట్రిక్‌ మూవీస్‌తో దూసుకెళుతోంది. ఇక ఇప్పుడు కాజల్‌ టైమొచ్చింది. తెలియలేదు కానీ, కాజల్‌ ఆల్రెడీ ఆ ట్రాక్‌ ఎప్పుడో ఎక్కేసింది.
ఇటీవల విడుదలైన 'సీత' సినిమాని ఆ తరహా మూవీగానే ప్రమోట్‌ చేశారు. విడుదలకు సిద్ధంగా ఉన్న 'ప్యారిస్‌ ప్యారిస్‌' హీరోయిన్‌ ప్రాధాన్యత ఉన్న మూవీనే. అయితే, అచ్చమైన సోషల్‌ మెసేజ్‌ కాన్సెప్ట్‌తో కాజల్‌ త్వరలో సందడి చేయనుందట. కేవలం హీరోయిన్‌ సెంట్రిక్‌ మూవీగానే ఈ సినిమాని రూపొందించనున్నారట. ఇంతకీ ఈ సినిమాకి డైరెక్టర్‌ ఎవరో తెలుసా.? తేజ. ఆల్రెడీ మూడు సినిమాలు రూపు దిద్దుకున్న ఈ కాంబోలో నాలుగో సినిమా కూడా చర్చల దశలో ఉందట. ఈ సినిమాతో కాజల్‌ నిర్మాతగా కొత్త అవతారమెత్తనుందనే ప్రచారం జరుగుతోంది. ఇప్పటికే పలువురు ముద్దుగుమ్మలు నిర్మాతలుగా సత్తా చాటుతున్నారు. ఆ దిశగా కాజల్‌ కూడా విజయం సాధించాలని ఆశిద్దాం.
