నాగార్జున హీరోగా తెరకెక్కిన 'సోగ్గాడే చిన్నినాయనా' సూపర్‌ గుడ్‌ ఫిలింగా అన్ని వర్గాల వారినీ ఆకట్టుకుని, మంచి విజయం అందుకుంది. ఆ సినిమాకి సీక్వెల్‌ రూపొందించాలని ఎప్పటి నుండో నాగ్‌ అనుకుంటున్న సంగతి తెలిసిందే. 'సోగ్గాడే చిన్ని నాయనా' డైరెక్టర్‌ కళ్యాణ్‌కృష్ణ గత రెండేళ్లుగా ఈ స్క్రిప్టుపై వర్క్‌ చేస్తున్నాడు కూడా. దీన్నో డ్రీమ్‌ ప్రాజెక్టుగా డీల్‌ చేస్తున్నాడట కళ్యాణ్‌ కృష్ణ. అందుకే ఎలాగైనా ఈ సినిమా తెరకెక్కించాలన్న కసితో ఉన్నాడట. అందుకు నాగార్జున సపోర్ట్‌ కూడా బాగానే ఉందని తెలుస్తోంది.
అయితే, కళ్యాణ్‌కృష్ణకు ఈ సినిమాలో రెమ్యునరేషన్‌ లేదంటూ ప్రచారం జరుగుతోంది గత కొంతకాలంగా. ఆ ప్రచారం నిజమేననిపిస్తోంది. ఎందుకంటే, కళ్యాణ్‌కృష్ణను నాగార్జున తన బిజినెస్‌ పార్ట్‌నర్‌గా తీసుకున్నాడట. ఈ సినిమాని నాగార్జున స్వయంగా నిర్మిస్తున్నారు. ఈ నిర్మాణంలో కళ్యాణ్‌కృష్ణను కూడా భాగస్వామిని చేశాడట. ఈ డీల్‌కి కళ్యాణ్‌కృష్ణ ఒప్పుకోవడంతో త్వరలో ఈ సినిమా పట్టాలెక్కనుందనీ తెలుస్తోంది. 'మన్మధుడు 2' తర్వాత నాగార్జున చేయబోయే చిత్రం ఇదేనని అంటున్నారు.
ఈ సినిమాకి 'బంగార్రాజు' టైటిల్‌ ఎప్పటి నుండో నలుగుతోంది. సో అదే టైటిల్‌ ఫిక్స్‌ చేసే అవకాశముంది. ఈ సినిమాకి స్పెషల్‌ అట్రాక్షన్‌ ఏంటంటే, ఇది మల్టీ స్టారర్‌ మూవీగా రూపొందుతుండడం. అక్కినేని తండ్రీ కొడుకులు, నాగ్‌, చైతూ కలిసి ఈ సినిమాలో నటిస్తున్నారు. నాగార్జునది 'సోగ్గాడే..'లోని బంగార్రాజు పాత్రేనట. కానీ, చైతూ క్యారెక్టర్‌ విషయంలోనే కొంత సస్పెన్స్‌ నెలకొంది. మనవడి పాత్రలో నటిస్తాడా.? లేక చైతూ కోసం ఇంకేదైనా రిలేషన్‌ యాడ్‌ చేశాడా డైరెక్టర్‌ అనేది సినిమాలోనే చూడాలట.
