సినిమా కోసం ఎంతటి కష్టమైనా ఓర్చుతుంది ముద్దుగుమ్మ కంగనా రనౌత్‌. సినిమాపై ఆమెకున్న ప్యాషన్‌ అలాంటిది. తాజాగా 'మణికర్ణిక' మూవీలో నటిస్తోంది కంగనా. వీరనారి ఝాన్సీ లక్ష్మీభాయ్‌ జీవిత గాధ ఆధారంగా తెరకెక్కుతోన్న సినిమా ఇది. ఈ సినిమా కోసం చాలా కష్టపడుతోంది. కత్తి యుద్ధాలు, గుర్రపు స్వారీల్లో ప్రత్యేకంగా శిక్షణ తీసుకుంటోంది. ఏదో సినిమా కోసం అన్నట్లుగా కాకుండా సీరియస్‌గా కాన్‌సన్‌ట్రేషన్‌ చేసి మరీ కసరత్తులు చేస్తోందట కంగనా. కత్తి ఫైటింగుల్లో ప్రత్యేక శిక్షణ పొందుతోంది. ఈ శిక్షణలో భాగంగా చిన్న చిన్న గాయాలైన పట్టించుకోవడం లేదట కంగనా. బాలీవుడ్‌లో స్టార్‌ ఇమేజ్‌ దక్కించుకోవడం చాలా కష్టం. అలాంటిది కష్టపడి ఆ ఇమేజ్‌ని దక్కించుకుంది ముద్దుగుమ్మ కంగనా. కష్టపడితే ఫలితం ఖచ్చితంగా దక్కుతుందనడానికి బెస్ట్‌ ఎగ్జామ్‌పుల్‌ కంగనానే. ఇకపోతే సినిమా విషయానికి వస్తే, తెలుగులో 'గౌతమీ పుత్ర శాతకర్ణి' వంటి చారిత్రాత్మక చిత్రాన్ని తెరకెక్కించి విజయం అందుకున్న డైరెక్టర్‌ క్రిష్‌ ఈ సినిమాని తెరకెక్కిస్తున్నారు. 'బాహుబలి', 'బజరంగీ భాయిజాన్‌' వంటి సక్సెస్‌ఫుల్‌ స్టోరీలనందించిన ప్రముఖ రచయిత విజయేంద్రప్రసాద్‌ ఈ సినిమాకి కథనందించారు. అత్యంత ప్రతిష్ఠాత్మకంగా తెరకెక్కుతోన్న చిత్రమిది. భారీ బడ్జెట్‌ మూవీ కూడా. ప్రస్తుతం శరవేగంగా షూటింగ్‌ జరుపుకుంటోంది. వీరనారి ఝాన్సీ లక్ష్మీ భాయిగా కంగనా గెటప్‌, నటన ఆకట్టుకునేలా ఉండబోతున్నాయి.