ప‌వ‌న్ క‌ల్యాణ్ - క‌త్తి మ‌హేష్ ఎపిసోడ్‌ని ఎవ్వ‌రూ మ‌ర్చిపోలేరు. సోష‌ల్ మీడియాలో.. ప‌వ‌న్‌పై క‌త్తి మ‌హేష్ చేసే వివాదాస్ప‌ద పోస్ట్‌లు వైర‌ల్ అయ్యాయి. క‌త్తి మ‌హేష్‌నీ పాపుల‌ర్ చేశాయి. ఆ పోస్టింగుల వల్లే క‌త్తి మ‌హేష్ బిగ్ బాస్ హౌస్ వ‌ర‌కూ సెల‌బ్రెటీ హోదాలో వెళ్ల‌గ‌లిగాడు. ఎన్నిక‌ల ముందు క‌త్తి మ‌హేష్ కాస్త కామ్ అయ్యాడు. ఎన్నిక‌ల త‌ర‌వాత పెద్ద‌గా యాక్టీవ్ గా లేడు. ఇప్పుడు మ‌ళ్లీ ప‌వ‌న్‌పై పోస్టింగుల‌కు తెర లేపాడు.

తాజాగా ప‌వ‌న్‌పై క‌త్తి చేసిన ఓ కామెంట్ హాట్ టాపిక్ అయ్యింది. ప‌వ‌న్ ఇటీవ‌ల హైద‌రాబాద్‌లో ఓ ఖ‌రీదైన ఇల్లు కొనుగోలు చేశాడ‌ని, దాని విలువ దాదాపుగా 130 కోట్ల‌ని, ఎప్పుడూ నా ద‌గ్గ‌ర డ‌బ్బు లేదూ, లేదూ అని చెప్పుకునే ప‌వ‌న్ క‌ల్యాణ్‌కి అంత డ‌బ్బు ఎక్క‌డి నుంచి వ‌చ్చింది? జ‌న‌సేన సినిమా వ‌ర్క‌వుట్ అయిన‌ట్టేనా? అంటూ వెట‌కారంగా ఓ పోస్ట్ పెట్టాడు.

ఇటీవ‌ల ప‌వ‌న్ హైద‌రాబాద్‌లో ఓ ఇల్లు కొనుగోలు చేసిన మాట వాస్త‌వ‌మే. అయితే... ఆ ఇంటి ఖ‌రీదు 130 కోట్లు ఉంటుందా? అనేది అనుమాన‌మే. మొత్తానికి క‌త్తి మ‌హేష్‌కామెంట్లు మ‌రోసారి పొలిటిక‌ల్‌గా అల‌జ‌డి సృష్టించ‌బోతోంది. వీటిపై ప‌వ‌న్‌గానీ, జ‌న‌సేన ప్ర‌తినిధులుగానీ ఎలా స్పందిస్తారో చూడాలి.