అలనాటి మేటి నటి సావిత్రి జీవిత గాధ ఆధారంగా తెరకెక్కుతోన్న చిత్రం 'మహానటి'. ఈ సినిమాలో లీడ్‌ రోల్‌లో కీర్తి సురేష్‌ నటిస్తున్న సంగతి తెలిసిందే. ఈ సినిమాకి సంబంధించి అఫీషియల్‌ పోస్టర్స్‌ ఏమీ విడదల కాలేదు. కానీ కొన్ని ఫోటోలు మాత్రం సోషల్‌ మీడియాలో చక్కర్లు కొడుతున్నాయి. కీర్తి సురేష్‌ మంచి నటి. అందగత్తె. కానీ సావిత్రి పాత్రలో ఎలా ఉండబోతోందనే అనుమానాలున్నాయి. ఈ ఫోటోలు చూస్తే ఆ అనుమానాలు తొలగుతాయి. కానీ ఈ అందం చాలదు. తన వరకూ కీర్తి సురేష్‌ అందంగానే ఉంది. కానీ మహానటి సావిత్రి గొప్ప నటి మాత్రమే కాదు, చాలా అందగత్తె కూడా. ఆమెది నేచురల్‌ బ్యూటీ. ఆ అందాన్ని రీ ప్లేస్‌ చేయడం ఎవ్వరి తరం కాదు. కానీ కీర్తి సురేష్‌ ఈ ఫోటోల్లో చాలా బాగుంది. సావిత్రి కొప్పుతో చాలా చాలా అందంగా కనిపిస్తోంది. తానేంటో నిరూపించుకోవడానికి ఈ సినిమా కీర్తి సురేష్‌కి ఓ ఛాలెంజ్‌ అనే చెప్పాలి. ఇప్పటికే కీర్తి సురేష్‌ మంచి నటి అని నిరూపించుకుంది. అయితే ఈ సినిమా ఆమెకి మరింత గుర్తింపు తెచ్చి పెట్టే సినిమా అని చెప్పడంలో అతిశయోక్తి కాదు. ఏరి కోరి ఈ పాత్రకి ఆమెను ఎంచుకున్నారు. ముద్దుగుమ్మ సమంత ఓ కీలక పాత్రలో నటిస్తోంది 'మహానటి'లో. దుల్కర్‌ సల్మాన్‌, ప్రకాష్‌రాజ్‌తో పాటు విజయ్‌ దేవరకొండ, షాలినీ, ప్రగ్యా జైశ్వాల్‌ తదితర తారాగణం నటిస్తున్న ఈ సినిమా ప్రస్తుతం షూటింగ్‌ దశలో ఉంది. తెలుగు, తమిళ, మలయాళ భాషల్లో ఈ సినిమా రూపొందుతోంది.