డైరెక్టర్‌ కృష్ణవంశీకి నటి రమ్యకృష్ణ భార్య అన్న సంగతి తెలిసిందే. అయితే విశేషం ఏంటంటే రమ్యకృష్ణ హీరోయిన్‌గానూ, క్యారెక్టర్‌ ఆర్టిస్టుగానూ బోలెడన్ని చిత్రాల్లో నటించారు. కానీ రమ్యకృష్ణ, కృష్ణవంశీ సినిమాల్లో నటించింది లేదు, ఒక్క 'చంద్రలేఖ' సినిమా తప్ప. ఆ సినిమా టైంకి వీరిద్దరూ ఇంకా భార్యా భర్తలు కాలేదు. ఈ విషయాన్ని కృష్ణవంశీనే స్వయంగా చెప్పారు. ఇన్నాళ్లుగా అలా ఎందుకు జరగలేదనీ కృష్ణవంశీని అడిగితే, ఆమె నా భార్య. ఓ ఆర్టిస్టుగా, ఆమెను నా సినిమాల్లో చూడలేను అని ఆయన చెప్పారు. రమ్యకృష్ణ మంచి నటి అని నేను ప్రత్యేకించి చెప్పనక్కర్లేదు. ఆమె నటనకు ప్రేక్షకులు ఎప్పుడో బ్రహ్మరథం పట్టేశారు. ఇక 'బాహుబలి' చిత్రంలో రమ్యకృష్ణ క్యారెక్టర్‌ని అంత గొప్పగా డిజైన్‌ చేసినందుకు డైరెక్టర్‌ రాజమౌళి క్రెడిట్‌ని మెచ్చుకోవాలి అని ఆయన చెప్పారు. కృష్ణవంశీ తాజా చిత్రం 'నక్షత్రం' ప్రమోషన్‌ కార్యక్రమాల్లో భాగంగా ఆయన ఇచ్చిన ఇంటర్వ్యూలో ఈ విషయాలను పంచుకున్నారు. సందీప్‌ కిషన్‌, రెజీనా ముఖ్య పాత్రల్లో నటిస్తోన్న చిత్రం 'నక్షత్రం'. సాయి ధరమ్‌ తేజ్‌, ప్రగ్యా జైశ్వాల్‌ కీలక పాత్రలు పోషిస్తున్నారు. ఈ సినిమాని జూలై 28న ప్రేక్షకుల ముందుకు తీసుకు రానుంది చిత్ర యూనిట్‌. ఇప్పటికే విడుదలైన ఈ సినిమా ట్రైలర్‌ మంచి రెస్పాన్స్‌ అందుకుంది. సినిమాపై కూడా భారీగా అంచనాలున్నాయి.