సినిమా ప‌రిశ్ర‌మ‌కు సోష‌ల్ మీడియా ఎంత బ‌లంగా మారిందో, అంతే బ‌ల‌హీన‌త‌గా త‌యారైంది. ఓ ఫొటో, ట్రైల‌ర్‌, పోస్ట‌ర్ బ‌య‌ట‌కు వ‌స్తే... నిమిషాల్లో వైర‌ల్ అయిపోతోంది. లీకు వీడియోలైతే మ‌రింత క్ష‌ణాల్లో పాకేస్తోంది. ఎన్నో వ్య‌య ప్ర‌యాస‌ల‌తో క‌ష్ట‌ప‌డి షూటింగ్ చేస్తే... అందుకు సంబంధించిన ఫుటేజీ క్ష‌ణాల్లో బ‌య‌ట‌కు రావ‌డం ఎవ‌రికైనా పెద్ద షాకే.
ప్ర‌స్తుతం ఆ షాక్‌లోనే ఉంది `వెంకీ మామ` టీమ్‌. వెంక‌టేష్‌, నాగ‌చైత‌న్య క‌థానాయ‌కులుగా తెర‌కెక్కుతున్న చిత్ర‌మిది. బాబి ద‌ర్శ‌క‌త్వం వ‌హిస్తున్నారు. ప్ర‌స్తుతం రాజ‌మండ్రిలో షూటింగ్ జ‌రుగుతోంది. అక్క‌డ వెంక‌టేష్‌, నాగ‌చైత‌న్య‌ల‌పై కొన్ని సన్నివేశాలు తెర‌కెక్కిస్తున్నారు. అవుడ్డోర్‌లో జ‌రిగే సీన్ ఇది. చుట్టూ చాలామంది జూనియ‌ర్ ఆర్టిస్టులు ఉన్నారు. కానీ.. ఎవ‌రో ఆక‌తాయి... ఓ స‌న్నివేశాన్ని త‌న ఫోన్‌లో రికార్డు చేసి బ‌య‌ట‌కు వ‌దిలాడు. అది ఇప్పుడు నెట్టింట్లో వైర‌ల్ అవుతోంది.
సినిమా మొద‌లై వారం రోజులు కాక‌ముందే ఇలా లీకులు మొద‌లైపోయాయంటే.. మున్ముందు ప‌రిస్థితి ఏమిటా అని చిత్ర‌బృందం టెన్ష‌న్ ప‌డుతోంది. అవుడ్డోర్ షూటింగ్ అంటే.. సినిమావాళ్లు మ‌రింత జాగ్ర‌త్త‌గా ఉండాలేమో..!!
