బుల్లి తెర‌పై చిరంజీవి ఎంట్రీ అన‌గానే అంచ‌నాలు ఆకాశానికి తాకాయి.  మెగాస్టార్ రాక‌తో.. ఎమ్ ఈ కే షో.. రేటింగ్స్ ఆకాశానికి తాక‌డం ఖాయ‌మంటూ బుల్లి తెర వ‌ర్గాలు లెక్క‌లు క‌ట్టేశాయి. చిరు ఇమేజ్, చిరు బ్రాండ్ మీలో ఎవ‌రు కోటీశ్వ‌రుడు షోకి బ్ర‌హ్మాండంగా క‌లిసొస్తాయ‌ని, ఇక బుల్లి తెర‌పైనా చిరు రికార్డులు బ‌ద్ద‌లు కొట్ట‌డం ఖాయ‌మ‌ని అంచనాలు వేసుకొన్నారు. అయితే ఎమ్ ఈ కే రేటింగుల్లో ఎక్క‌డో అట్ట‌డుగున నిలిచింది. ఈ షోకి 5.8 రేటింగు మాత్ర‌మే ద‌క్కింది. ఓ యావ‌రేజ్ సినిమా తొలిసారి టెలీకాస్ట్ అయితే... వ‌చ్చి రేటింగ్ ఇంత‌కంటే ఎక్కువ‌గానే ఉంటుంది. చిరు వ‌చ్చినా.. మీలో ఎవ‌రు కోటీశ్వ‌రుడు పోగ్రాంకి కొత్త కళ రాక‌పోవ‌డం షాకింగ్ విష‌య‌మే. చిరుతో పోలిస్తే  నాగార్జునే ఈ కార్య‌క్ర‌మాన్ని బాగా ర‌క్తి క‌ట్టించాడ‌ని, చిరుకి అనుభ‌వం లేక‌పోవ‌డం వ‌ల్ల‌, ఈ షో జ‌నాద‌ర‌ణ‌కు నోచుకోవ‌డం లేద‌ని విశ్లేషకులు తేల్చేస్తున్నారు. మెగా ఫ్యాన్స్‌ని ఆక‌ట్టుకోవ‌డంలో చిరంజీవి విఫ‌ల‌మ‌య్యార‌ని, వాళ్లు చూసినా.... ఈ షో రేటింగులు ఎక్క‌డో ఉండేవ‌ని, ముందు చిరు వాళ్ల‌ని ఆక‌ట్టుకొనే ప్ర‌య‌త్నాలు చేయాల‌ని కొంత‌మంది వ్యాఖ్యానిస్తున్నారు. ఈ షో గ‌ట్టెక్కాలంటే ఇప్పుడు మెగా అభిమానులే పూనుకోవాలి.  చిరు షో హిట్ట‌వ్వ‌డ‌మా, లేదంటే ఇలానే త‌క్కువ రేటింగుల‌తో కొన‌సాగ‌డ‌మా అనేది చిరు ఫ్యాన్స్ చేతుల్లోనే ఉంది.