మ‌ల‌యాళంలో ఘ‌న విజ‌యం సాధించిన `లూసీఫ‌ర్‌`ని తెలుగులో రీమేక్ చేయాల‌నుకుంటున్నారు. ఈ సినిమా హ‌క్కులు రామ్ చ‌ర‌ణ్ ద‌గ్గ‌రున్నాయి. ఈ సినిమాని రీమేక్ చేయాల‌ని వుంద‌ని ఓ సంద‌ర్భంలో చిరంజీవినే స్వ‌యంగా చెప్పారు. అయితే ఆ త‌ర‌వాత లూసీఫ‌ర్ రీమేక్ గురించి ఎలాంటి అప్ డేటూ లేదు. కాక‌పోతే... ఈలోగా చిరంజీవి ఆలోచ‌న‌లు మారిన‌ట్టు తెలుస్తోంది. ఈ క‌థ‌ని ప‌వ‌న్ క‌ల్యాణ్‌తో రీమేక్ చేస్తే బాగుంటుంద‌న్న ఆలోచ‌న‌లో చిరు ఉన్నాడ‌ట‌. రామ్ చ‌ర‌ణ్ ప్రొడ‌క్ష‌క్ష‌న్‌లో ప‌వ‌న్ క‌ల్యాణ్ హీరోగా ఓ సినిమా వ‌స్తే బాగుంటుంద‌న్న‌ది అభిమానుల ఆశ‌. చ‌ర‌ణ్ కూడా బాబాయ్ తో ఓ సినిమా చేస్తా అని చాలాసార్లు చెప్పాడు. ఆ అవ‌కాశం లూసీఫ‌ర్ రూపంలో వ‌చ్చింద‌నుకోవాలి.

ఇటీవ‌ల ఓ ఇంట‌ర్వ్యూలో లూసీఫ‌ర్ గురించి ఆస‌క్తిక‌ర‌మైన కామెంట్లు చేశాడు చిరంజీవి. లూసీఫ‌ర్ రీమేక్ రైట్స్ ని త‌న కోస‌మే తీసుకున్నార‌ని, అయితే ప‌వ‌న్ అడిగితే ఈ క‌థ ఇవ్వ‌డానికి సిద్ధంగా ఉన్నాన‌ని తేల్చేశాడు చిరు. లూసీఫర్ రీమేక్ చేయాల‌న్న ఆలోచ‌న ప‌వ‌న్ కి ఉందో లేదో తెలీదు గానీ, తెర వెనుక మాత్రం చ‌ర‌ణ్ త‌న ప్ర‌యత్నాలు మొద‌లెట్టేసిన‌ట్టే ఉన్నాడు. అయితే ఈ క‌థ ప‌వ‌న్ కంటే చిరుకే బాగా సూట్ అవుతుంది. లూసీఫ‌ర్ సినిమా చూసిన‌వాళ్లెవ‌రైనా ఈ మాటే చెబుతారు కూడా. ప‌వ‌న్ కోసం చ‌ర‌ణ్ మ‌రో క‌థ వెదుక్కోవ‌డం బెట‌ర్‌. కానీ తెలుగు సినీ ప‌రిశ్ర‌మ‌లో ఎప్పుడైనా ఏదైనా జ‌ర‌గొచ్చు. లూసీఫ‌ర్ విష‌యంలో ఏమ‌వుతుందో చూడాలి.