మంచి సినిమా వ‌స్తే... అభినందించ‌డానికి మ‌హేష్ బాబు ఎప్పుడూ ముందే ఉంటాడు. సినిమా చూసిన వెంట‌నే త‌న స్పంద‌న‌ని ట్విట్ట‌ర్ వేదిక‌గా అభిమానుల‌తో పంచుకుంటుంటాడు. చిత్ర‌బృందానికి అభినంద‌న‌లు తెలుపుతాడు. ప్ర‌స్తుతం మ‌హేష్ మ‌న‌సు దోచిన సినిమా `గ‌ద్ద‌ల కొండ గ‌ణేష్‌`. వ‌రుణ్ తేజ్ క‌థానాయకుడిగా న‌టించిన చిత్ర‌మిది. పూజా హెగ్డే క‌థానాయిక‌.

హ‌రీష్ శంక‌ర్ ద‌ర్శ‌క‌త్వం వ‌హించిన ఈ చిత్రం ఇటీవ‌లే విడుద‌లైంది. ఈ సినిమా ఇప్పుడు మ‌హేష్ మెప్పు పొందింది. గ‌ద్దల‌కొండ గ‌ణేష్ చాలా బాగుంద‌ని, చూస్తున్నంత సేపూ ఆస్వాదించాన‌ని, వ‌రుణ్ న‌ట‌న ఆక‌ట్టుకుంద‌ని మ‌హేష్ ట్వీట్ చేశాడు. హ‌రీష్ శంక‌ర్‌నీ, వ‌రుణ్‌ని అభినందించాడు. ఈ విజ‌యానికి మీరు అర్హులేనంటూ.. ట్వీట్ చేశాడు మ‌హేష్‌బాబు. ఈ ట్వీట్ చిత్ర‌బృందంతో స‌రికొత్త ఉత్సాహాన్ని నింపిన‌ట్టైంది. బాక్సాఫీసు ద‌గ్గ‌ర గ‌ద్ద‌ల‌కొండ హ‌వా ఏమాత్రం త‌గ్గ‌లేదు. సోమ‌వారం కూడా వ‌సూళ్లు జోరుగానే సాగాయ‌ని ట్రేడ్ వ‌ర్గాలు తెలిపాయి.