బాలీవుడ్‌ బ్యూటీ కైరా అద్వానీ తొలిసారిగా తెలుగులో నటిస్తున్న చిత్రం 'భరత్‌ అనే నేను'. ఇంతవరకూ హీరో మహేష్‌బాబుకి సంబంధించిన పలు పోస్టర్స్‌ రిలీజ్‌ చేసింది చిత్ర యూనిట్‌. కానీ ఇంతవరకూ హీరోయిన్‌ పోస్టర్‌ ఒక్కటీ రాలేదు. అందుకే ఆ లోటు తీర్చేలా ఉంది ఈ తాజా పోస్టర్‌. కైరా అద్వానీ, మహేష్‌బాబు జంటగా నడుచుకుని వస్తున్నట్లుగా ఉన్న ఈ పోస్టర్‌ని కైరా అద్వానీ తన ట్విట్టర్‌ ద్వారా అభిమానులతో పంచుకుంది. 

'మహేష్‌తో ఇది నా తొలి పోస్టర్‌ అందరికీ నచ్చుతుందని భావిస్తున్నా' అంటూ హ్యాష్‌ ట్యాగ్‌ కూడా జత చేసింది. ఈ లుక్‌కి మహేష్‌ ఫ్యాన్స్‌ నుండి వస్తున్న రెస్పాన్స్‌ అంతా ఇంతా కాదు. లైకుల మీద లైకులూ, షేర్స్‌ మీద షేర్లు చేస్తూ అభిమానులు పండగ చేసుకుంటున్నారు. ఏమాటకామాటే చెప్పాలి ఈ లుక్‌ సూపర్బ్‌గా ఉందిలే. కైరాతో మహేష్‌ జోడీ కొత్తగా ఫ్రెష్‌గా అనిపిస్తోంది. స్కై బ్లూ కలర్‌ శారీలో హుందాగా, ఆహ్లాదంగా అనిపిస్తోంది కైరా అద్వానీ. 

కొరటాల శివ దర్శకత్వంలో తెరకెక్కుతోన్న ఈ సినిమాని డీవీవీ ఎంటర్‌టైన్‌మెంట్స్‌ పతాకంపై డీవీవీ దానయ్య నిర్మిస్తున్నారు. ఏప్రిల్‌ 20న ప్రేక్షకుల ముందుకు రానుందీ చిత్రం. ఏప్రిల్‌ 1న సెకండ్‌ ఆడియో సింగిల్‌ రిలీజ్‌ కానుందనీ ఈ సినిమాకు మ్యూజిక్‌ అందించిన రాకింగ్‌ మ్యూజిక్‌ స్టార్‌ దేవిశ్రీ ప్రసాద్‌ తాజాగా ప్రకటించారు. 

పొలిటికల్‌ బ్యాక్‌ డ్రాప్‌లో తెరకెక్కుతోన్న ఈ సినిమాలో సూపర్‌స్టార్‌ మహేష్‌బాబు ముఖ్యమంత్రి పాత్రలో నటిస్తున్నారన్న సంగతి తెలిసిందే.