''ఓ హీరో కోసం ద‌ర్శ‌కుడు రెండేళ్లు ఎదురుచూడ‌డం చాలా క‌ష్టం. ఈరోజుల్లో రెండు నెల‌లు కూడా ఓపిక ఉండ‌డం లేదు. మ‌రో హీరోని వెదుక్కుంటున్నారు'' ఇదీ 'మహర్షి' ప్రీ రిలీజ్ వేడుక‌లో మ‌హేష్ బాబు చేసిన కామెంట్. ఇది వ‌ర‌కైతే ఈ కామెంట్‌కి పెద్ద‌గా ప్రాధాన్యం ఉండేది కాదు. కానీ ఇప్పుడు అలా కాదు. ఈ కామెంటే టాక్ ఆఫ్ ది టౌన్ అయ్యింది. దానికి కార‌ణం సుకుమార్ అని వేరే చెప్పాలా? మహర్షి త‌ర‌వాత మ‌హేష్ సుకుమార్‌తో ఓ సినిమా చేయాల్సింది.
సుకుమార్ క‌థ కూడా సిద్దం చేసేసుకున్నాడు. కానీ ప‌ట్టాలెక్క‌డం కాస్త ఆల‌స్యం అయ్యింది. దాంతో సుకుమార్ మ‌హేష్‌ని వ‌దిలేసి అల్లు అర్జున్ ప‌క్క‌న చేరాడు. మ‌హేష్ చేసిన కామెంట్‌కి లింకు అక్క‌డ ఉంద‌న్న‌మాట. ఈ కామెంట్ సుకుమార్ ని ఉద్దేశించి చేసిన‌దే అని వేరే చెప్పాలా? సుకుమార్ మ‌హేష్ ని వ‌దిలేసి వ‌చ్చేశాక మ‌హేష్ పాజిటీవ్‌గా స్పందిస్తూ ఓ ట్వీట్ చేశాడు. అనుకోని కార‌ణాల వ‌ల్ల ఈ సినిమా ఆగిపోయింద‌ని, త్వ‌ర‌లో త‌ప్ప‌కుండా క‌ల‌సి ప‌నిచేస్తామ‌ని పాజిటీవ్‌గా మాట్లాడాడు.
అయితే ఇప్పుడు ఈ మాట‌ల‌తో సుకుమార్ ఎపిసోడ్‌ని మ‌హేష్ లైట్‌గా తీసుకోలేద‌ని, మ‌న‌సులో పెట్టుకునే ఇలా మాట్లాడాడ‌ని అర్థ‌మైపోతోంది. దానికి త‌గ్గ‌ట్టుగానే మ‌హేష్ ద‌ర్శ‌కుల గురించీ సినిమాల గురించీ ప్ర‌స్తావిస్తూ సుకుమార్‌నీ, 'నేనొక్క‌డినే' సినిమానీ మ‌ర్చిపోయాడు. ఇదంతా రివైంజ్‌లో భాగ‌మే అన్న‌ది మ‌హేష్ అభిమానుల మాట.
