మ‌హ‌ర్షి త‌ర‌వాత.. సుకుమార్‌తో మహేష్ బాబు ఓ సినిమా చేస్తాడ‌ని ప్ర‌చారం జ‌రిగింది. సుకుమార్ కూడా మ‌హేష్‌ని క‌లిసి కొన్ని క‌థ‌లు చెప్ప‌డం, మహేష్ మార్పులు సూచించ‌డం తెలిసిన విష‌యాలే. మ‌ధ్య‌లో అనిల్ రావిపూడి కూడా వ‌చ్చాడు. అనిల్ రావిపూడి క‌థ మ‌హేష్‌కి న‌చ్చ‌డంతో ఆ సినిమా సెట్స్‌పైకి వెళ్తుంద‌న్న వార్త‌లొచ్చాయి. అయితే గ‌త రెండు రోజులుగా మహేష్- సుకుమార్ కాంబినేష‌న్‌లో సినిమాపై మ‌ళ్లీ వార్తలు చ‌క్క‌ర్లు కొట్టాయి.
సుకుమార్ చెప్పిన క‌థ కూడా మ‌హేష్‌కి న‌చ్చేసింద‌ని, ఇప్పుడు రెండు సినిమాల్నీ ఒకేసారి మొద‌లెట్టేస్తార‌ని మహేష్ డ‌బుల్ బొనాంజా కొట్టేసిన‌ట్టే అని అనుకున్నారు. అయితే... అనూహ్యంగా సుకుమార్ - బ‌న్నీ సినిమా ఓకే అయిపోయింది. మహేష్ సినిమాని ప‌క్క‌న పెట్టి బ‌న్నీకి క‌మిట్ అయిపోయాడు సుకుమార్. ఇప్పుడు సుకుమార్ - మహేష్ సినిమా లేన‌ట్టే. దానికి గ‌ల కార‌ణాన్ని కూడా మహేష్ బ‌య‌ట‌పెట్టాడు.
కేవ‌లం క్రియేటీవ్ డిఫ‌రెన్సెన్ వ‌ల్ల‌నే ఈ సినిమా ఆగిపోయింద‌ని, భవిష్యత్తులో త‌ప్ప‌కుండా సుకుమార్‌తో పని చేస్తాన‌ని, త‌ను తీయ‌బోయే సినిమా బాగా ఆడాల‌ని ఆల్ ది బెస్ట్ చెప్పాడు మహేష్. అంతేకాదు... సుకుమార్‌తో తీసిన `వ‌న్` త‌న కెరీర్‌లోనే బెస్ట్ సినిమాగా మిగిలిపోతుంద‌ని గుర్తు చేసుకున్నాడు. సో... వీరిద్ద‌రి సినిమా ఇప్పుడు లేక‌పోయినా.. భవిష్యత్తులో మాత్రం త‌ప్ప‌కుండా ఉంటుందన్న‌మాట.
