'నేల టికెట్‌' సినిమాతో తెలుగులోకి ఎంట్రీ ఇచ్చిన ముద్దుగుమ్మ మాళవికా శర్మ. ఎప్పుడో వచ్చిన ఈ సినిమాని అప్పుడే మర్చిపోయారంతా. రవితేజ హీరోగా నటించాడీ సినిమాలో. సినిమా పెద్దగా ఆదరణకు నోచుకోలేదు. దాంతో ఈ ముద్దుగుమ్మని కూడా పెద్దగా పట్టించుకోలేదెవ్వరు. అందముంది. అభినయం కూడా ఉంది. కావాల్సినంత గ్లామర్‌ ఉంది. ఇంకేముంది.. హీరోయిన్‌గా పాగా వేయాలనుకుంది.
కానీ, అన్నీ అనుకున్నట్లు జరగవు కదా. మాళవికా శర్మ విషయంలోనూ అదే జరిగింది. డెబ్యూ మూవీ తప్ప మరో సినిమా చేతికి చిక్కలేదు. ఈ సంగతి అలా ఉంచితే, ఈ పాప నటించిన 'నేల టికెట్‌' హిందీలో డబ్‌ అయ్యింది. ఈ సినిమా బుల్లితెరపై ప్రసారమైంది. అదేంటీ.. తెలుగులో ఎప్పుడో వచ్చేసింది కదా.. ఇంకేంటీ.. అనుకుంటే, ఏమో హిందీ తంబీలకు నచ్చుతుందేమో అనుకున్నారు. కానీ ఎవ్వరూ పట్టించుకోలేదు. సాధారణంగా ఇలాంటి సినిమాల్ని అందులో నటించే వాళ్లు కూడా పట్టించుకోరు.
కానీ మాళవికా శర్మ మాత్రం హిందీలో ఈ సినిమాని చూడడానికి ఎగ్జైట్‌మెంట్‌గా ఎదురు చూస్తున్నానని చెప్పింది. లేటెస్ట్‌గా హిందీలో ఈ సినిమా డబ్‌ అయ్యి బుల్లితెరపై ప్రసారమయ్యింది. చూసిన ఆ కొద్దిమందిలోనే కొందరు అమ్మడి నటనను ప్రశంసిస్తే, ఇంకొందరు సినిమా ఏం బాగా లేదని విమర్శించారు. మరికొందరైతే ఆల్రెడీ యూ ట్యూబ్‌లో చూసేశామని సోషల్‌ మీడియాలో పోస్ట్‌లు పెట్టారు. ఏది ఏమైతేనేం మాళవిక పాపకు హిందీలో కూడా వర్కవుట్‌ అవ్వలేదంతే.
