ఒక‌ప్పుడు అగ్ర క‌థానాయ‌కుల చిత్రాల‌కు సంగీతం అందించి స్టార్ మ్యూజిక్‌డైరెక్ట‌ర్‌గా చ‌లామ‌ణీ అయ్యాడు మ‌ణిశ‌ర్మ చిరంజీవి నుంచి వెంక‌టేష్ వ‌ర‌కూ మహేష్ నుంచి ఎన్టీఆర్ వ‌ర‌కూ... అన్నిట్లోనూ మ‌ణి పేరే మెరిసేది. టాప్ హీరోల సూప‌ర్ హిట్ సినిమాల్లో త‌న‌కంటూ ఓ వాటా సంపాదించేసుకున్నాడు మ‌ణి. అయితే త‌మ‌న్‌, దేవిశ్రీ ప్ర‌సాద్ లాంటి యువ జోరులో.. మ‌ణి ప్రాభ‌వం చాలా త‌గ్గింది. అవ‌కాశాలు త‌క్కువై, వ‌చ్చినా అందులో త‌న‌దైన మ్యాజిక్ చూపించ‌లేక - మ్యూజిక్ డైరెక్ట‌ర్ల రేసులో బాగా వెనుక‌బ‌డిపోయాడు. అయితే.. `ఇప్ప‌టికీ నాలో స‌త్తా త‌గ్గ‌లేదు. నాదంటూ ఓ రోజు మ‌ళ్లీ త‌ప్ప‌కుండా వ‌స్తుంది` అని మ‌ణి గ‌ట్టిగా చెప్పేవాడు.
అది `ఇస్మార్ట్ శంక‌ర్‌`తో వ‌చ్చేస్తోందేమో అనిపిస్తోంది. పూరి - రామ్ కాంబినేష‌న్‌లో తెరకెక్కిన సినిమా `ఇస్మార్ట్ శంక‌ర్‌`. మ‌ణిశ‌ర్మ సంగీతం అందిస్తున్నాడు. పూరి - మ‌ణిది విజ‌య‌వంత‌మైన జోడీ. వీరిద్ద‌రి కాంబోలో చిరుత, పోకిరిలాంటి సూప‌ర్ హిట్లున్నాయి. చాలాకాలం త‌ర‌వాత వీరిద్ద‌రి జోడీ మ‌రోసారి కుదిరింది. ఈ సినిమా నుంచి తొలి పాట శ్రోత‌ల ముందుకొచ్చింది. హైద‌రాబాదీ ఫోక్‌లో, డీజేకి బాగా ఉప‌యోగ‌ప‌డే బాణీతో మాస్‌ని మైమ‌ర‌పిస్తున్నాడు మ‌ణి. యూత్ ఫుల్ బాణీలు ఇప్పికీ త‌న ద‌గ్గ‌రున్నాయ‌ని, మాస్‌ని హుషారెత్తించ‌గ‌ల‌న‌ని ఈ బానీతో నిరూపించుకున్నాడు. మ‌ణి శ‌ర్మ మెలోడీల‌కు ప్ర‌సిద్ది. ఈ సినిమాలో అలాంటి ఓ అంద‌మైన మెలోడీ కూడా ఉంద‌ట. వాటితో పాటు మిగిలిన పాట‌లూ క్లిక్ అయితే.. మ‌ణి ఈజ్ బ్యాక్ అనుకోవొచ్చేమో.
