ఈ మధ్య జాన్వీ పేరు బాగా పాపులర్‌ అయిపోయింది. ఎందుకంటే ఈ పేరుతో ప్రస్తుతం వార్తల్లో ఉన్నది అతిలోక సుందరి కూతురు జాన్వీ కపూర్‌. అయితే మనం మాట్లాడుకునే జాన్వి మాత్రం శ్రీదేవి కూతురు కానే కాదు. మంజుల కూతురు. ఏ మంజుల అనుకుంటున్నారా? సూపర్‌ స్టార్‌ మహేష్‌బాబు సోదరి మంజుల. అంటే జాన్వి మహేష్‌బాబుకు మేనకోడలన్న మాట. ఇప్పుడు సీన్‌లోకి మహేష్‌ మేనకోడలు ఎందుకొచ్చిందంటారా? అయితే తెలుసుకోండి.

నటిగా, నిర్మాతగా పేరు తెచ్చుకున్న మంజుల తాజాగా మెగా ఫోన్‌ పట్టిన సంగతి తెలిసిందే కదా. సందీప్‌ కిషన్‌ హీరోగా ఓ సినిమాని తెరకెక్కిస్తోంది మంజుల. ఆ సినిమాలోనే ఈ జాన్వి నటిస్తోంది. అయితే హీరోయిన్‌గా కాదులెండి. ఓ ఇంపార్టెంట్‌ రోల్‌లో నటిస్తోంది జాన్వి. అచ్చం మేనమామను పోలినట్టే ఉంది. తొలి సినిమా తల్లి డైరెక్షన్‌లో నటిస్తోంది. తొలి సినిమా కదా, ఎలా నటిస్తుందా అని మంజుల కొంచెం టెన్షన్‌ పడిందట. కానీ జాన్వీ చాలా బాగా నటించిందంటోంది మంజుల. అంతేకాదు, జాన్విని చూస్తుంటే చిన్నప్పుడు మహేష్‌బాబు గుర్తొస్తున్నాడంటూ మంజుల సోషల్‌ మీడియాలో ట్వీట్‌ చేసింది. దాంతో పాటు ఓ పోస్టర్‌ కూడా పోస్ట్‌ చేసింది. ఈ పోస్టర్‌లో సందీప్‌ కిషన్‌తో జాన్వి సరదాగా ముచ్చటిస్తున్నట్లుగా ఉంది. అంతేకాదు మంజుల చెప్పింది నిజమే. అచ్చు మేనమామ మహేష్‌ని పోలినట్లుగానే ఉంది ఈ ముద్దుగుమ్మ. ప్రస్తుతానికి ఇంపార్టెంట్‌ రోల్‌తో తెరంగేట్రం చేసింది. ఇకపై హీరోయిన్‌గానూ జాన్వి సత్తా చాటుతుందేమో చూడాలి మరి.