ఇటీవల ప్రేక్షకుల ముందుకొచ్చింది 'రోగ్‌' సినిమా. కొత్త నటీనటులతో తెరకెక్కిన ఈ చిత్రం పూరీ జగన్నాధ్‌ డైరెక్షన్‌లో రూపొందింది. రొమాంటిక్‌ అండ్‌ యాక్షన్‌ ఎంటర్‌టైనర్‌గా తెరకెక్కిన ఈ చిత్రంలో ఇషాన్‌, మనారా చోప్రా, ఏంజెలా నటించారు. వీరిలో మనారా చోప్రాకి హీరోయిన్‌గా మంచి పేరు దక్కింది. ఈ ముద్దుగుమ్మ గతంలో పలు చిత్రాల్లో నటించింది. అయితే ఈ సినిమాతో బాగా పాపులర్‌ అయ్యింది. అందుకే క్రియేటివ్‌ డైరెక్టర్‌ రామ్‌ గోపాల్‌ వర్మ దృష్టిలో పడిందట బ్యూటీ మనారా చోప్రా. వర్మకు ప్రియ శిష్యుడు పూరీ జగన్నాధ్‌. పూరీ తెరకెక్కించిన 'రోగ్‌' సినిమా వర్మకు కూడా బాగా నచ్చిందట. అందులోనూ ముద్దుగుమ్మ మనారా చోప్రా నటన వర్మని బాగా ఇంప్రెస్‌ చేయడంతో, తన సినిమాలో ఆమెకి ఛాన్స్‌ ఇవ్వాలనుకుంటున్నాడనీ సమాచారమ్‌. ప్రస్తుతం వర్మ డైరెక్షన్‌లో రాబోతున్న 'సర్కార్‌ 3' సినిమా విడుదలకు సిద్ధంగా ఉంది. అమితాబ్‌ బచ్చన్‌ ఈ సినిమాలో ప్రధాన పాత్రలో నటిస్తున్నారు. ఆ తర్వాత అభిషేక్‌ బచ్చన్‌తో వర్మ ఓ సినిమా చేయనున్నారట. అదే 'అరెస్ట్‌' అనే సినిమా. ఈ సినిమాలోనే అమ్మడు మనారా చోప్రాకి వర్మ అవకాశం ఇవ్వనున్నారనీ ప్రచారం జరుగుతోంది. వర్మ సినిమాలోని హీరోయిన్స్‌కి ఓ ప్రత్యేకత ఉంటుంది. ఆ ప్రత్యేకత కలిగిన హీరోయిన్స్‌ లిస్ట్‌లోకి మనారా ఇంత త్వరగా చేరిపోవడం విశేషమే. అన్నట్లు మనారా చోప్రా, ప్రముఖ బాలీవుడ్‌ నటి ప్రియాంక చోప్రాకు చెల్లెలే అన్న విషయం గమనించాలి.