'ఒక్కడు మిగిలాడు' అనే సినిమాతో త్వరలో ప్రేక్షకుల ముందుకు రానున్న మంచువారబ్బాయ్‌ మంచు మనోజ్‌, ఆ సినిమా గురించి ఓ షాకింగ్‌ విషయం రివీల్‌ చేశాడు. అదేమిటంటే 'ఒక్కడు మిగిలాడు' సినిమాలో టిపికిల్‌ కామెడీ, టిపికల్‌ సాంగ్స్‌ ఉండవట. ఇది ఓ ప్రయోగాత్మక చిత్రమని ఇంతకు ముందే చెప్పాడు మంచు మనోజ్‌. అయినప్పటికీ అందులో కామెడీ ఉండదని, పాటలు ఉండవని ఎవరూ అనుకోలేదు. విలక్షణ చిత్రాల్ని ఎంపిక చేసుకుంటూ నటుడిగా తనకంటూ ఓ గుర్తింపు సంపాదించే ప్రయత్నంలో ఉన్న మంచు మనోజ్‌ని, ఇలాంటి ప్రయోగాత్మక చిత్రాలు చేస్తున్నందుకు అభినందించాలి. సినిమా అంటే అందులో పాటలుండాలి, కామెడీ ఉండాలి. అవి లేనిదే ఓ వర్గం ఆడియన్స్‌ని సినిమా మెప్పించదనే అభిప్రాయం ఉంది. అయితే కొన్ని సినిమాలు కమర్షియల్‌ హద్దుల్ని చెరిపేస్తూ, అన్ని వర్గాల ప్రేక్షకుల్నీ అలరించిన దాఖలాలున్నాయి. ఆ కోవలో 'ఒక్కడు మిగిలాడు' సినిమా కూడా సంచలన విజయాన్ని సంపాదించుకునే అవకాశాలైతే లేకపోలేదు. ఈ సినిమా కోసం మనోజ్‌ బాగా లావెక్కాడు. దానికి కారణం కూడా ఉంది. ఎల్‌టిటిఇ సంస్థ వ్యవస్థాపకుడైన వేలుపిళ్ళై ప్రభాకరన్‌ పాత్ర కోసమే అలా చేయాల్సి వచ్చింది. ఇంకో పాత్ర ఇంకా సస్పెన్స్‌. రెండో పాత్రలో మనోజ్‌ స్లిమ్‌గానే ఉంటాడట. కష్టాలు రానీ నష్టాలు రానీ ప్రయోగాల బాట మాత్రం వీడనని అంటున్న మనోజ్‌కి ఆల్‌ ది బెస్ట్‌ చెప్దాం.