'లై' సినిమాతో తెలుగు తెర ప్రేక్షకులకు పరిచయమైన బ్యూటీ మేఘా ఆకాష్‌. తొలి సినిమా విడుదలకు ముందు తెగ అంచనాలు పెంచేసిందీ బ్యూటీ. అయితే అంత అంచనాలు నమోదు చేసిన ఈ సినిమా అనూహ్యంగా విడుదల తర్వాత అంతటి విజయాన్ని అయితే నమోదు చేయలేకపోయింది. అయినా కానీ ఈ బ్యూటీకి క్రేజ్‌ ఏమాత్రం తగ్గలేదనే చెప్పాలి. ఎందుకంటే తొలి సినిమా విడుదల కాకముందే ఒకే హీరోతో రెండు సినిమాలకు కమిట్‌ అవ్వడం అనేది మామూలు విషయం కాదనే చెప్పాలి. 

రెండో సినిమాకి కూడా నితిన్‌, ఈ ముద్దుగుమ్మ పేరునే సూచించడం విశేషం. అన్నట్లు ఈ ముద్దుగుమ్మపై ఈ సారి ప్రత్యేకంగా ఓ పాట కూడా రాబోతోందట. నితిన్‌ - మేఘా ఆకాష్‌ జంటగా తెరకెక్కుతోన్న చిత్రం 'ఛల్‌ మోహన్‌రంగా'. పవన్‌ కళ్యాన్‌ క్రియేటివ్‌ వర్క్స్‌ బ్యానర్‌లో ఈ సినిమా తెరకెక్కుతోంది. కృష్ణ చైతన్య ఈ సినిమాతో దర్శకుడుగా పరిచయమవుతున్నాడు. ఈ సినిమాలో మేఘా ఆకాష్‌ పేరు మీద ఓ పాట ఉందట. ఆ పాటని హీరో నితినే కావాలని రాయించాడంటూ గాసిప్స్‌ వినిపిస్తున్నాయి. ఈ గాసిప్‌లో నిజమెంతో తెలీదు కానీ ఈ పాటను ఈ నెల 24న చిత్ర యూనిట్‌ విడుదల చేయనుంది. 

'గ..ఘ..మేఘ ..' అంటూ సాగే ఆ పాటలో మేఘా ఆకాష్‌ సో హాట్‌గా కనిపించనుందట. అలాగే ఈ ఇద్దరి మధ్యా కెమిస్ట్రీ కూడా 'లై' కన్నా బాగా ఈ సినిమాలో వర్కవుట్‌ అయ్యిందట. ఇటీవల విడుదలైన ఈ సినిమా టీజర్‌లో నితిన్‌ చెప్పే లవ్‌ డైలాగ్‌ యూత్‌కి బాగా కనెక్ట్‌ అయ్యింది. మంచి రెస్పాన్స్‌ అందుకుంది. 

ఆ సంగతి పక్కన పెడితే, అందాల మేఘా ఆకాష్‌ తాజాగా మరో క్రేజీ ప్రాజెక్ట్‌కి సంతకం చేసిందంటూ ప్రచారం జరుగుతోంది. అదీ ఓ యంగ్‌ హీరోతోనేనట. పేరున్న హీరో అంటున్నారు. ఇంతకీ ఆ సినిమా కథా కమామిషు ఏంటనే పూర్తి వివరాలు త్వరలో వెల్లడి కానున్నాయట.