'కృష్ణగాడి వీర ప్రేమ గాధ' ఫేం మెహరీన్‌ ఈ ఏడాది మూడు చిత్రాలతో ప్రేక్షకుల ముందుకు వచ్చింది. శర్వానంద్‌తో నటించిన 'మహానుభావుడు' సినిమాతో మంచి హిట్‌ కొట్టింది. తర్వాత మాస్‌ రాజా రవితేజతో 'రాజా ది గ్రేట్‌' అంటూ మరో హిట్‌నీ తన ఖాతాలో వేసేసుకుంది. ముచ్చటగా మూడో చిత్రం 'కేరాఫ్‌ సూర్య'తో ఫర్వాలేదనిపించింది.
ద్విభాషా చిత్రంగా విడుదలైన ఈ సినిమాలో సందీప్‌ కిషన్‌తో జత కట్టిందీ బ్యూటీ. కాగా లేటెస్టుగా 'జవాన్‌' సినిమాతో వచ్చేస్తోంది. సాయి ధరమ్‌ తేజ్‌ హీరోగా తెరకెక్కిన ఈ సినిమాలో మెహరీన్‌ - తేజు జంట చూడ ముచ్చటగా ఆలరించనుంది. ఇప్పటికే ఆ విషయం తెలిసిపోయింది ప్రోమోస్‌, పోస్టర్స్‌ ద్వారా. అలాగే ఈ బ్యూటీ ఇంతవరకూ నటించిన మూడు చిత్రాల్లో కన్నా 'జవాన్‌'లో మరింత అందంగా కనిపించనుందట. క్యారెక్టర్‌ పరంగానూ ఆమెకి ఎంతో సంతృప్తినిచ్చిన క్యారెక్టర్‌ అంటోంది మెహరీన్‌. ఈ సినిమాలో తన పాత్ర పేరు భార్గవి. భార్గవిగా మెహరీన్‌ ఓ ప్రొఫిషనల్‌ చిత్ర కారిణిగా కనిపించబోతోంది 'జవాన్‌'లో. అన్నట్లు ఈ భార్గవి కాస్ట్యూమ్స్‌ చాలా ప్రత్యేకంగా డిజైన్‌ చేశారట. సో ఇంతకు ముందెన్నడూ లేనంత గ్లామరస్‌గా కనిపించనుందట ఈ సినిమాలో మెహరీన్‌.
అన్నింటి కన్నా మించి, మెగా మేనల్లుడు సాయి ధరమ్‌ తేజ్‌ డాన్సుల సంగతి మనందరికీ తెలిసిందే కదా. ఆయనతో జత కట్టిన హీరోయిన్లు కూడా డాన్సుల్లో టాలెంట్‌ ప్రదర్శించాల్సిందే. అలా ఈ సినిమా కోసం ప్రత్యేకంగా డాన్సులో శిక్షణ తీసుకుందట మెహరీన్‌. తేజు పక్కన డాన్స్‌ చేసేందుకు ఈ చిన్నది చాలానే కష్టపడిందటండోయ్‌. బి.వి.యస్‌.రవి దర్శకత్వంలో ఈ సినిమా తెరకెక్కుతోంది. డిశంబర్‌ 1న ప్రేక్షకుల ముందుకు రానుంది. మన ముద్దుగుమ్మ తన తర్వాతి ప్రాజెక్టులు ఏంటయ్యా అంటే ఆరడుగుల బుల్లెట్‌ గోపీచంద్‌తో ఓ సినిమాకి సైన్‌ చేసింది. తెలుగుతో పాటు తమిళంలోనూ రెండు, మూడు మంచి ప్రాజెక్టులు మెహరీన్‌ చేతిలో ఉన్నాయి.
