అక్కినేని నాగ చైతన్య గతేడాది 'ప్రేమమ్‌', సాహసం శ్వాసగా సాగిపో' వంటి చిత్రాలతో వరుస విజయాలు అందుకున్నాడు. అదే జోరును ఈ ఏడాది కూడా కొనసాగించాలనుకుంటున్నాడు కాబోలు. అస్సలు తీరిక లేకుండా వరుస పెట్టి సినిమాలు సైన్‌ చేస్తున్నాడు. కళ్యాన్‌ కృష్ణ డైరెక్షన్‌లో చైతూ హీరోగా తెరకెక్కుతోన్న 'రారండోయ్‌ వేడుక చూద్దాం' సినిమా విడుదలకి రెడీగా ఉంది. నాగార్జునతో 'సోగ్గాడే చిన్ని నాయనా' సినిమాని తెరకెక్కించిన కళ్యాన్‌ కృష్ణ చైతూతో తెరకెక్కిస్తోన్న ఈ సినిమా ఓ పండగలా ఉండబోతోంది. ఈ సినిమాలో ముద్దుగుమ్మ రకుల్‌ ప్రీత్‌ సింగ్‌ హీరోయిన్‌గా నటిస్తోంది. మరో పక్క చైతూ మరిముత్తు దర్శకత్వంలో ఓ సినిమాకి కమిట్‌ అయ్యాడు. ఈ సినిమా డిఫరెంట్‌ కాన్సెప్ట్‌ మూవీ అంటున్నారు. ఈ రెండు సినిమాలు ఇలా ఉండగా, మరో కొత్త సినిమాకి గ్రీన్‌ సిగ్నల్‌ ఇచ్చేశాడు చైతూ. ఈ సినిమా చందూ మొండేటి దర్శకత్వంలో తెరకెక్కుతోంది. ఆల్రెడీ చందూ మొండేటి - నాగ చైతన్య కాంబినేషన్‌లో తెరకెక్కిన మూవీ 'ప్రేమమ్‌' సక్సెస్‌ అయ్యింది. సో ఈ కాంబినేషన్‌ అంటే మళ్లీ హిట్‌ కొట్టడం ఖాయం అని భావిస్తున్నారు. అదీ కాక చైతూతో ఈ సారి చందూ మొండేటి తెరకెక్కింబోయే చిత్రం ఓ ప్రయోగాత్మక చిత్రం కానుందని ప్రచారం జరుగుతోంది. గతంలో యంగ్‌ హీరో నిఖిల్‌తో 'కార్తికేయ' వంటి చిత్రాన్ని కొత్తగా తెరకెక్కించాడు చందూ మొండేటి. అదే తరహాలో చైతూకి మరో హిట్‌ ఇచ్చేందుకు తగిన కథని సిద్ధం చేశాడట ఈ డైరెక్టర్‌. అన్నట్లు ఈ సినిమాలో అనుపమా పరమేశ్వరన్‌ హీరోయిన్‌గా నటిస్తోంది.
