అక్కినేని నాగచైతన్యకి రెట్రో లుక్‌ అంటే ఎంత ఇష్టమో.! '100 పర్సంట్‌ లవ్‌' సినిమా కోసం ఓల్డ్‌ లుక్‌ వచ్చేలా ఓ పాటలో కన్పించాడు నాగచైతన్య. ఆ తర్వాత 'మనం' సినిమా కోసం ఫ్లాష్‌ బ్యాక్‌ ఎపిసోడ్‌లో 'రెట్రో' లుక్‌ ట్రై చేసిన చైతూ, ఇటీవల నటించిన 'సవ్యసాచి' సినిమాలో కూడా ఓ పాట కోసం రెట్రో లుక్‌లో కనిపించిన సంగతి తెల్సిందే. 

లేటెస్ట్‌గా తన కొత్త సినిమా కోసం మళ్ళీ రెట్రో లుక్‌లో కన్పించి అందర్నీ ఆశ్చర్యపరిచాడు. నేడు అక్కినేని నాగచైతన్య పుట్టినరోజు. ఈ నేపథ్యంలో నాగచైతన్య కొత్త సినిమా లుక్‌ బయటకు వచ్చింది. పాత వెస్పా స్కూటర్‌ మీద చైతూ, రెట్రో లుక్‌తో కనిపించాడు. శివ నిర్వాణ ఈ చిత్రాన్ని రూపొందిస్తున్న సంగతి తెల్సిందే. నాగచైతన్య సరసన అతని సతీమణి సమంత నటిస్తోన్న సినిమా ఇది. చైతూ, సమంత కాంబినేషన్‌లో ఇది నాలుగో సినిమా కావడం గమనార్హం. 

ఈ సినిమాకి 'మజిలి' అనే టైటిల్‌ పరిశీలనలో వుంది. సినిమా షూటింగ్‌ 40 శాతానికి పైగా పూర్తయ్యిందట. సమంత, నాగచైతన్య ఈ సినిమాలో భార్యాభర్తలుగా నటిస్తున్నారట. ఇంట్రెస్టింగ్‌ కాన్సెప్ట్‌తో ఈ సినిమా తెరకెక్కుతోందనీ, చైతూ, సమంత కెమిస్ట్రీ ఈ సినిమాకే హైలైట్‌ అనీ విశ్వసనీయ వర్గాల సమాచారాన్ని బట్టి తెలుస్తోంది. 

ఇదిలా వుంటే, ఈ రోజు పుట్టినరోజు జరుపుకుంటోన్న నాగచైతన్యకి, సోషల్‌ మీడియాలో బర్త్‌ డే విషెస్‌ పోటెత్తుతున్నాయి. పలువురు సినీ ప్రముఖులు నాగచైతన్యకి బర్త్‌ డే విషెస్‌ అందిస్తున్నారు.