అభిమానులు నిన్న సాయంత్రం నుండే ధియేటర్స్‌ వద్ద సందడి షురూ చేశారు. ధియేటర్స్‌ డెకరేషన్‌ చేయడంతో పాటు ప్రత్యేక పూజలు, హంగామా కొనసాగించారు రాత్రంతా. ప్రత్యేకంగా టీ షర్టులు తయారు చేయించుకున్నారు కొన్ని చోట్ల. కొన్ని చోట్ల స్వీట్లు పంచారు. 

సినిమా సూపర్‌ హిట్‌ అంటూ తొలి ఆట పూర్తి కాకముందే టాక్‌ బయటకి తీసుకొచ్చేశారు. ఓవర్సీస్‌లో కూడా హంగామా కనిపించింది. ఉదయం నుండీ తెలుగు రాష్ట్రాల్లో ధియేటర్స్‌ వద్ద అభిమానులు పోటెత్తారు. సినిమాలో యాక్షన్‌ సీన్స్‌ చాలా బాగున్నాయని చైతూ సినిమా కోసం ఫుల్‌ ఈజ్‌తో డాన్సులేశాడనీ, మాధవన్‌ అప్పియరెన్స్‌ సినిమాకే హైలైట్‌ అనీ, నిధి అగర్వాల్‌ గ్లామర్‌ అదనపు ఎట్రాక్షన్‌ అనీ ప్రీ రిలీజ్‌ రిపోర్ట్స్‌ తేల్చేశాయి. 

ఇంతకు ముందు నాగచైతన్య నటించిన ఏ సినిమాకీ లేనంత హంగామా అభిమానులు చేస్తున్నారు ఈ సినిమాకి. ఈ హైప్‌ ఇప్పుడే కొత్తగా చూస్తున్నామనీ సినిమా మంచి విజయం సాధించడం ఖాయమనీ అభిమానులు ధీమాగా ఉన్నారు. ఈ హైప్‌ చూస్తుంటే ఆశించిన దాని కన్నా ఊహించని స్థాయిలో ఓపెనింగ్స్‌ రానున్నాయని ట్రేడ్‌ పండితులు అంచనా వేస్తున్నారు. చందూ మొండేటి దర్శకత్వంలో తెరకెక్కిందీ సినిమా. 

ఈ ఏడాది 'రంగస్థలం' సినిమాతో బ్లాక్‌ బస్టర్‌ అందుకున్న మైత్రీ మూవీస్‌ మేకర్స్‌ బ్యానర్‌లో 'సవ్యసాచి'తో మరో సూపర్‌హిట్‌ చేరిపోవడం ఖాయమనిపిస్తోంది.