అక్టోబర్‌ 6, 7వ తేదీల్లో హిందూ, క్రిస్టియన్‌ సాంప్రదాయాల్లో గోవాలో వివాహం చేసుకున్న నాగ చైతన్య, సమంతల వెడ్డింగ్‌ రిసెప్షన్‌ ఆదివారం హైద్రాబాద్‌లో ఘనంగా జరిగింది. ఈ రిసెప్షన్‌ వేడుకు నాగ చైతన్య, సమంతల తరపు నుండి అనేక మంది అతిరధ మహారధులు విచ్చేశారు. సినీ పరిశ్రమ నుండి పలువురు ప్రముఖులు విచ్చేసి, నాగ చైతన్యకు, సమంతకు ఆశీర్వచనాలు అందించారు. కాగా రేపట్నుంచి నాగ చైతన్య షూటింగ్‌కి హాజరు కానున్నాడు. ప్రస్తుతం చైతూ 'సవ్యసాచి' సినిమాలో నటిస్తున్నాడు. చందూమొండేటి ఈ సినిమాకి దర్శకత్వం వహిస్తున్నారు. ముద్దుగుమ్మ నిధి అగర్వాల్‌ ఈ సినిమాలో హీరోయిన్‌గా నటిస్తోంది. ఇదో ప్రయోగాత్మక చిత్రం. 

ఈ ఏడాది నాగ చైతన్య కెరీర్‌ జోరుగానే నడుస్తోంది. 'రారండోయ్‌ వేడుక చూద్దాం' సినిమాతో మంచి హిట్‌ అందుకున్న చైతూ, 'యుద్ధం శరణం'తో కొంచెం నిరాశ పడినా, 'సవ్యశాచి'తో మళ్లీ విజయం అందుకోవడం ఖాయమంటున్నాయి చిత్ర వర్గాలు. 'ప్రేమమ్‌' వంటి సక్సెస్‌ మూవీని తెరకెక్కించిన డైరెక్టర్‌ చందూమొండేటి. ఈ కాంబినేషన్‌ అంటే మళ్లీ హిట్‌ పక్కా అని అంచనాలేస్తున్నారు. ఈ సినిమాలో చైతూ క్యారెక్టర్‌ సరికొత్తగా ఉండనుంది. ఎడమ చేయి పని చేయని కుర్రాడి పాత్రలో నటిస్తున్నాడు చైతూ. ఫస్ట్‌లుక్‌ పోస్టర్‌కి మంచి స్పందన వచ్చింది. త్వరలోనే టీజర్‌ ప్లాన్‌ చేస్తున్నారు. 

కాగా పెళ్లి తదితర కార్యక్రమాల నిమిత్తం షూటింగ్‌ నుండి కొంచెం గ్యాప్‌ తీసుకున్న చైతూ, ఇటీవలే షూటింగ్‌లో పాల్గొన్నాడు. ఇక రెగ్యులర్‌గా షూటింగ్‌లో పాల్గొని వీలైనంత త్వరగా సినిమా కంప్లీట్‌ చేయనున్నాడట. ఇది కాక చైతూ చేతిలో మరో రెండు ప్రాజెక్టులున్నాయి. అందులో వెంకటేష్‌తో ఓ మల్టీస్టారర్‌ కూడా ఉంది.