నాగశౌర్యకి చిన్నప్పటి నుండీ కార్లంటే చాలా ఇష్టమట. పెద్దయినా ఆ ఇష్టం పోలేదంటున్నాడు మన యంగ్‌హీరో. ఎంత ఇష్టం అంటే అత్యంత కాస్ట్‌లీ కారు ఒకటి కొనిచ్చి తనకి ప్రపోజ్‌ చేస్తే, ముందే వెనకా చూడకుండా ఆ అమ్మాయిని పెళ్లి చేసేసుకుంటాననీ నాగశౌర్య 'ఛలో' ప్రమోషన్స్‌లో సరదాగా చెప్పాడు కూడా. అందుకే తన ఇష్టాన్ని చిన్నతనం నుండీ గ్రహించిన నాగశౌర్య తల్లి నాగశౌర్యకి ఓ అదిరిపోయే గిఫ్ట్‌ ఇచ్చింది.  

అదేంటంటే.. ఇంకేముంటుంది ఓ సూపర్‌ కార్‌. సూపర్‌ కార్‌ అంటే సూపర్‌ పవర్సేమీ ఉండవండోయ్‌ దానికి. కానీ అత్యంత కాస్ట్‌లీ కార్‌ అన్నమాట. సుమారు కోటిన్నర విలువ చేసే 'పోర్షే' కారును నాగశౌర్య తల్లి ఉషా ముల్పూరి కొడుకు నాగశౌర్యకు గిఫ్ట్‌గా ఇచ్చారు. ఎందుకంటారా? ఇటీవల ప్రేక్షకుల ముందుకొచ్చిన 'ఛలో' సినిమా సూపర్‌ డూపర్‌ విజయం అందుకుంది. ఈ సినిమా నాగశౌర్య స్వీయ నిర్మాణంలో తెరకెక్కింది. ఈ సినిమా విజయం సాధించినందుకే నాగశౌర్య తన తల్లి నుండి ఈ సర్‌ప్రైజింగ్‌ గిఫ్ట్‌ అందుకున్నాడు. 

ఆ గిఫ్ట్‌ తనకెంతో సంతోషాన్నిచ్చిందనీ నాగశౌర్య తన ఆనందాన్ని ట్విట్టర్‌లో పంచుకున్నాడు. వెంకీ కుడుముల దర్శకత్వంలో తెరకెక్కిన ఈ సినిమాలో నాగశౌర్యకి జోడీగా కొత్త భామ రష్మికా మండన్నా నటించింది. ఈ ఇద్దరికీ ఈ సినిమా మంచి విజయాన్ని అందించింది. ఈ విజయోత్సాహంతోనే నాగశౌర్య మరిన్ని క్రేజీ ప్రాజెక్టులకు సైన్‌ చేసేస్తున్నాడట. 

త్వరలోనే ఆ ప్రాజెక్ట్స్‌ వివరాలు ప్రకటిస్తానంటున్నాడు మనోడు. మరో పక్క తమిళంలో నాగశౌర్య నటించిన 'కరు' సినిమా 'కణం' పేరుతో తెలుగులో విడుదలవుతోంది. ఈ సినిమాలో 'ఫిదా' బ్యూటీ సాయి పల్లవి హీరోయిన్‌గా నటిస్తోంది. త్వరలోనే ఈ సినిమా ప్రేక్షకుల ముందుకు రానుంది.