నాగార్జున నటించిన 'మన్మధుడు 2' రీమేక్‌ మూవీ అన్న సంగతి తెలిసిందే. మళ్లీ ఇంకో రీమేక్‌ నాగార్జున కోసం సిద్ధమవుతున్నట్లుగా తాజా సమాచారం. ఈ సారి ఓ బాలీవుడ్‌ రీమేక్‌ని నాగార్జునతో ప్లాన్‌ చేస్తున్నారట. సీనియర్‌ నిర్మాత కమ్‌ డిస్ట్రిబ్యూటర్‌ సునీల్‌ నారంగ్‌ ఈ ప్రాజెక్టును సిద్ధం చేస్తున్నాడట. బాలీవుడ్‌లో అజయ్‌ దేవగణ్‌ నటించిన 'రైడ్‌' యాక్షన్‌ ఎంటర్‌టైనర్‌గా మంచి విజయం సాధించింది. ఇప్పుడీ సినిమాని తెలుగులో నాగార్జున హీరోగా రీమేక్‌ చేయాలనుకుంటున్నారట. ఈ రీమేక్‌పై నాగ్‌ కూడా సుముఖంగా ఉన్నాడనీ తెలుస్తోంది.
ప్రస్తుతం ఆయన బుల్లితెరపై 'బిగ్‌బాస్‌' రియాల్టీ షోతో బిజీగా ఉన్నారు. ఈ షో పూర్తి కాగానే, ఆయన అర్జెంటుగా పూర్తి చేయాల్సిన ప్రాజెక్ట్‌ ఒకటుంది. అదే 'బంగార్రాజు' సినిమా. నాగచైతన్య, నాగ్‌ కాంబినేషన్‌లో ఈ సినిమా తెరకెక్కనుంది. 'సోగ్గాడే చిన్ని నాయనా' దర్శకుడు కళ్యాణ్‌ కృష్ణ దర్శకత్వంలో ఈ సినిమా తెరకెక్కనుంది. ఇది పూర్తి కాగానే, 'రైడ్‌' రీమేక్‌పై దృష్టి పెట్టనున్నాడనీ తెలుస్తోంది.
అయితే, ఈ విషయమై క్లారిటీ రావాల్సి ఉంది. దీంతో పాటు, నాగార్జున కొంతమంది కొత్త దర్శకులను కూడా లైన్‌లో పెట్టి ఉంచాడు. కొత్త దర్శకుల్ని ఎంకరేజ్‌ చేయడంలో నాగ్‌ ఎప్పుడూ ముందుంటాడు. సో ఆయన కోసం కొందరు కొత్త దర్శకులు కొత్త కథలతో కసరత్తులు చేస్తున్నారట. చూడాలి మరి, మన్మధుడు ఏం చేస్తాడో.
