ప్ర‌తీ హీరోకీ ఓ వ్యూహం ఉంటుంది. ఈ సినిమా త‌ర‌వాత, ఈ సినిమా చేయాలి అనో, ఈ కాంబినేష‌న్ సెట్ చేసుకోవాల‌నో అనుకుంటాడు. ఎన్టీఆర్ కూడా అలాంటి ప‌క్కా వ్యూహంతో ముందుకు వెళ్లే న‌టుడే. అయితే ఎన్టీఆర్ వ్యూహాల‌కు షారుఖ్ ఖాన్ చెక్ పెట్టాడు. `ఆర్.ఆర్.ఆర్` త‌ర‌వాత ఎన్టీఆర్ త‌మిళ ద‌ర్శ‌కుడు అట్లీతో ఓ సినిమా చేద్దామ‌నుకున్నాడు. అట్లీ కూడా ఎన్టీఆర్‌ని ఈమ‌ధ్య క‌లిసి, ఓ క‌థ కూడా వినిపించాడు. అయితే.. ఇప్పుడు ఈ ప్రాజెక్టు కాస్త వెన‌క్కి వెళ్ల‌బోతోంది.
ఎందుకంటే అట్లీ ఇప్పుడు షారుఖ్ ఖాన్ తో సినిమా చేయ‌బోతున్నాడు. అవును.. అట్లీతో ఓ సినిమా చేయాల‌ని షారుఖ్ డిసైడ్ అయ్యాడు. ప్ర‌స్తుతం విజ‌య్‌తో ఓ సినిమా చేస్తున్నాడు అట్లీ. ఇది దీపావ‌ళికి రిలీజ్ అవుతుంది. ఆ వెంట‌నే షారుఖ్ తో సినిమా మొద‌లయ్యే ఛాన్స్ ఉంది. 2020 జులై నాటికి `ఆర్.ఆర్.ఆర్` పూర్త‌వుతుంద‌ని, ఆ త‌ర‌వాత అట్లీతో సినిమా చేయొచ్చ‌ని అనుకున్నాడు ఎన్టీఆర్. కానీ ఆర్.ఆర్.ఆర్ ఆల‌స్యం అవ్వ‌డంతో.. అట్లీతో సినిమా చేజారిపోయిన‌ట్టైంది.
