ఇప్పుడు హీరోల‌తా `పాన్ ఇండియా` జ‌పం ప‌ట్టారు. తెలుగులోనే కాదు... సౌత్ మాత్ర‌మే కాదు.. మొత్తం ఇండియానే ఏలేద్దాం అనుకుంటున్నారు. అందుకే `పాన్ ఇండియా` సినిమా చేసేద్దాం అంటూ డిసైడ్ అయిపోతున్నారు. క‌థ ఎలాంటిదైనా స‌రే, `పాన్ ఇండియా` ట్యాగ్ త‌గిలిస్తున్నారు. స్టార్ హీరోలు పాన్ ఇండియా మంత్రం జ‌పించ‌డంలో త‌ప్పు లేదు. అయితే మీడియం రేంజు హీరోలు సైతం అదే పాట పాడడం ఆశ్చ‌ర్యం క‌లిగిస్తోంది.

నాని ఇప్పుడు అదే బాట ప‌డుతున్నాడు. పాన్ ఇండియా హీరో అనిపించుకోవాల‌ని చూస్తున్నాడు. త‌న తాజా చిత్రం `శ్యామ్ సింగ‌రాయ్‌`ని పాన్ ఇండియా స్థాయిలో విడుద‌ల చేయాల‌నుకుంటున్నాడ‌ట‌. నాని ద్విపాత్రాభిన‌యం చేస్తున్న సినిమా ఇది. రాహుల్ సంకృత్య‌యిన్ ద‌ర్శ‌కుడు. సాయి ప‌ల్ల‌వి హీరోయిన్‌గా న‌టిస్తోంది. కొల‌కొత్తా నేప‌థ్యంలో సాగే సినిమా ఇది. గురువారం చిత్రీక‌ర‌ణ లాంఛ‌నంగా మొద‌లెడ‌తారు. మ‌రి ఈసినిమా పాన్ ఇండియా రేంజ్ లో ఉంటుందా? లేదా? అనేది తెలియాలంటే ఇంకొన్ని రోజులు ఆగాలి.