నయనతార పెళ్ళి చేసుకునేదెప్పుడు.? అని ఆమె అభిమానులు చాలాకాలంగా ఎదురుచూస్తున్నారు. అది ఆమె ఇష్టం. అయినాగానీ, నయనతార - విఘ్నేష్‌ శివన్‌ మధ్య చాలాకాలంగా ప్రేమాయణం నడుస్తోంది. ఇద్దరూ కలిసి సహజీవనం సాగిస్తున్నట్లు ప్రచారం జరుగుతోంది. ప్రచారమేంటి, ఇది నిజం కూడా.. అని పలు సందర్భాల్లో ఈ ఇద్దరూ పరోక్షంగా సంకేతాలు పంపారు. తాజాగా, తన పిల్లలకు నయనతార తల్లి అవుతుందంటూ అసలు విషయాన్ని విఘ్నేష్‌ శివన్‌ చాలా స్పష్టంగా చెప్పేశాడు.
పిల్లలు సరే, పెళ్ళి సంగతేంటి.? అనడిగితే మాత్రం ఈ ఇద్దరి నుంచీ సమాధానం దొరకడంలేదు. ‘అది మా వ్యక్తిగత అంశం. మేం పెళ్ళి చేసుకుంటామా.? లేదా.? అన్నది సమయం వచ్చినప్పుడు మీకే అర్థమవుతుంది..’ అని పలు సందర్భాల్లో విఘ్నేష్‌, నయన్‌ చెప్పుకొచ్చారు. ఇదిలా వుంటే, ఈ ఏడాది చివర్లోనే నయన - విఘ్నేష్‌ వైవాహిక బంధంతో ఒక్కటవబోతున్నారనీ, ఈ నేపథ్యంలో ‘పిల్లల ప్రస్తావన’ విఘ్నేష్‌ శివన్‌ నుంచి వచ్చిందనీ అంటున్నారు. మరోపక్క, నయనతార గర్భవతి.. అంటూ కొన్ని గాసిప్స్‌ కోలీవుడ్‌ మీడియాలో చక్కర్లు కొడుతుండడం గమనార్హం. అయితే, నయనతార సన్నిహితులు మాత్రం, ఈ గాసిప్స్‌లో నిజం లేదంటున్నారు. ప్రస్తుతం నయనతార పెళ్ళి గురించిగానీ, పిల్లల గురించిగానీ ఆలోచించడంలేదనీ, ఆమె పూర్తిగా కెరీర్‌ మీదనే ఫోకస్‌ పెట్టారన్నది వారు చెబుతున్న మాట.
