'సైరా నరసింహారెడ్డి'లో నరసింహారెడ్డి భార్య 'సిద్ధమ్మ' పాత్రలో నటించి ప్రశంసలు అందుకుంది నయనతార. ఈ దీపావళికి మరో పెద్ద సినిమాతో రాబోతోంది. అదే ఇళయ దళపతి విజయ్‌ నటించిన 'బిగిల్‌' చిత్రం. తెలుగులో 'విజిల్‌' పేరుతో ఈ సినిమాని విడుదల చేస్తున్నారు. ఈ సినిమాలో విజయ్‌కి జోడీగా నయనతార నటిస్తోంది. ఈ సినిమాపై భారీ అంచనాలున్నాయి. మరోవైపు సంక్రాంతికి సూపర్‌ స్టార్‌ రజనీకాంత్‌తో 'దర్బార్‌' సినిమాతో సందడి చేయనుంది. రెండూ క్రేజీ ప్రాజెక్టులే.
ఈ రెండింటికీ మధ్య ఓ హీరోయిన్‌ ఓరియెంటెడ్‌ మూవీ కూడా విడుదలకు సిద్ధంగా ఉంది. వీటితో పాటు మరిన్ని ప్రాజెక్టులు నిర్మాణ దశలో ఉన్నాయి నయన్‌ చేతిలో. సినిమాలతో ఇంత బిజీగా ఉన్న నయనతార, ముంబయ్‌ బ్యూటీ కత్రినా కైఫ్‌తో కలిసి ఓ యాడ్‌ షూట్‌లో పాల్గొంది. కత్రినా కైఫ్‌ సొంతంగా స్టార్ట్‌ చేసిన ఓ కాస్మోటిక్‌ బ్రాండ్‌ కంపెనీని ప్రమోట్‌ చేసేందుకు నయనతార ముందుకొచ్చింది. కత్రినా కైఫ్‌, నయనతార కాంబినేషన్‌లో రూపొందిన ఈ యాడ్‌ షూట్‌ ఇటీవలే జరిగింది.
ఈ సందర్భంగా ఆన్‌ సెట్స్‌లో తీసిన వీడియో ఒకటి కత్రినా తాజాగా సోషల్‌ మీడియాలో షేర్‌ చేసింది. దక్షిణాది అందాల భామ నయనతారకు థాంక్స్‌.. అంటూ ఈ వీడియో షేర్‌ చేసింది కత్రినా కైఫ్‌. కత్రినా, నయన్‌ సరదాగా ముచ్చటించుకుంటున్న వీడియో ఇది. నెట్టింట్లో ఈ వీడియోకి మంచి రెస్పాన్స్‌ వస్తోంది.
