పాపం.... నిఖిల్‌. త‌న‌కేం క‌ల‌సి రావ‌డం లేదు. కొత్త సినిమాలేవీ నిఖిల్ ద‌రి చేర‌డం లేదు. ఉన్న సినిమా విడుద‌ల కావ‌డం లేదు. 'అర్జున్ సుర‌వ‌రం' అనే సినిమా రెడీ అయి దాదాపు యేడాది కావొస్తోంది. ఇదిగో.. అదిగో అంటున్నారు త‌ప్ప‌, ఈ సినిమాకు రిలీజ్ డేట్ ఇంకా ఫిక్స్ చేయ‌డం లేదు. చాలాసార్లు విడుద‌ల తేదీ ప్ర‌క‌టించి, వాయిదా వేశారు. జ‌నం కూడా ఈ సినిమా ఒక‌టి ఉంద‌న్న విష‌య‌మే మ‌ర్చిపోయారు. అయితే.. ఇప్పుడు ఈసినిమాకి మోక్షం ల‌భించింది.

న‌వంబ‌రు మొద‌టి వారంలో అర్జున్ సుర‌వ‌రం సినిమాని విడుద‌ల చేయ‌డానికి నిర్మాత‌లు సన్నాహాలు చేస్తున్నారు. న‌వంబ‌రులోనే త‌న కొత్త సినిమానీ నిఖిల్ మొద‌లెడ‌తాడ‌ట‌. 'కార్తికేయ 2' సినిమా చేద్దామ‌ని ఎప్ప‌టి నుంచో అనుకుంటున్నాడు నిఖిల్‌. చందూ మొండేటి స్క్రిప్టు కూడా త‌యారు చేసేశాడు. ఈ సినిమానే న‌వంబ‌రు మొద‌టి వారంలో ప‌ట్టాలెక్కిస్తార‌ట‌. అంటే... ఆగిపోయిన సినిమా విడుద‌ల అవుతోంది, కొత్త సినిమా మొద‌ల‌వుతుంది. నిఖిల్ కి మంచి రోజులు మొద‌లైన‌ట్టే.