నితిన్‌ కొత్త సినిమా పేరు 'వీడెవడు' అట! అని కొన్ని రోజుల క్రితం గుసగుసలు వినవచ్చాయ్‌. కానీ ఆ 'వీడవడు' సినిమాలో హీరో నితిన్‌ కాదని తేలిపోయింది. ఇంతకీ ఈ 'వీడెవడు' ఎవడో తెలుసా? మన పండుగాడు. అంటే మహేష్‌బాబు కాదు, 'ఒరేయ్‌ పండు' సినిమాలో నటించిన సచిన్‌ జోషి. బిజినెస్‌ టైకూన్‌ వారసుడైన సచిన్‌ జోషీకి నటన మీద ఆసక్తి ఎక్కువ. సినీ రంగంలో రాణించాలనే కసితో ఎన్నో సినిమాలు చేశాడు. అయితే ఎన్ని సినిమాలు చేసినా హీరోగా తెలుగులో నిలదొక్కుకోలేకపోతున్నాడు. ఈసారి 'వీడెవడు' సినిమాతో హిట్టు కొట్టాలనే పట్టుదలతో ఉన్నాడట. మన టాలీవుడ్‌ హీరో అక్కినేని అఖిల్‌కి సచిన్‌ జోషీ మంచి స్నేహితుడు. అఖిల్‌ ముందుగా 'వీడెవడు' లుక్‌ని విడుదల చేశాడు. అయితే అందులో హీరో ఎవరో మాత్రం సస్పెన్స్‌గా ఉంచాడు. దాంతో అందరూ నితిన్‌ సినిమాయేమోనని అనుకున్నారు. చివరికి సస్పెన్స్‌ వీడింది. 'వీడెవడు' సినిమాలో నటిస్తున్నది సచిన్‌ జోషి అని తేలింది. తాతినేని సత్య దర్శకత్వంలో రూపొందుతోన్న ఈ సినిమాలో రైనా జోషి హీరోయిన్‌గా నటిస్తోంది. త్వరలో ఈ సినిమా విడుదల కానుంది. త్వరలో ఓ మెగా ఈవెంట్‌ ద్వారా 'వీడెవడు' విశేషాల్ని తెలియజేయనున్నారట. పలువురు యంగ్‌ హీరోలు ఈ వేడుకలో కన్పించనున్నారని సమాచారమ్‌.