అవునండీ మీరు విన్నది నిజమే. నిత్యామీనన్‌కి హాలీవుడ్‌ ఛాన్స్‌ దక్కింది. అయితే, తెరపై కనిపించదు. వినిపిస్తుందంతే. 2013లో డిస్నీ సంస్థ నుండి వచ్చిన యానిమేషన్‌ చిత్రం 'ఫ్రోజన్‌'కి ఇప్పుడు సీక్వెల్‌ రూపొందుతోంది. ఈ సీక్వెల్‌లో రాకుమారి ఎల్సా పాత్రకు నిత్యామీనన్‌ వాయిస్‌ అందిస్తోంది. అలా హాలీవుడ్‌కి ఎంట్రీ ఇస్తోంది నిత్యామీనన్‌. తెలుగు, తమిళ, మలయాళ భాషల్లో పలు సినిమాల్లో నటించిన నిత్యామీనన్‌ ఈ మధ్యనే బాలీవుడ్‌లోకి అడుగుపెట్టింది.

అక్షయ్‌ కుమార్‌ ప్రధాన పాత్రలో తెరకెక్కిన 'మిషన్‌ మంగళ్‌'లో నిత్యా మీనన్‌ కీలక పాత్ర పోషించింది. ఈ సినిమా బాక్సాఫీస్‌ వద్ద మంచి వసూళ్లు రాబట్టిన సంగతి తెలిసిందే. ఇప్పుడు ఆమె హాలీవుడ్‌ ఎంట్రీ కూడా ఈ రకంగా షురూ అయ్యింది. ఏమో, భవిష్యత్తులో నిత్యాని హాలీవుడ్‌ తెరపైనా చూస్తామేమో. మరోవైపు ప్రస్తుతం నిత్యా మీనన్‌ తమిళంలో దివంగత తమిళనాడు ముఖ్యమంత్రి జయలలిత బయోపిక్‌లో నటిస్తోంది. 'తలైవి' టైటిల్‌తో రూపొందుతోన్న ఈ సినిమా వచ్చే ఏడాది నుండి సెట్స్‌ మీదికి వెళ్లనుంది. లేటెస్ట్‌గా విడుదల చేసిన 'తలైవి' పోస్టర్స్‌లో నిత్యామీనన్‌ అచ్చు 'అమ్మ' జయమ్మనే తలపిస్తోంది.