విజయ్‌ దేవరకొండ తెలివితేటలు అన్నీ ఇన్నీ కావు. ఈ మధ్య చూస్తూనే ఉన్నాం. ఎంతో తెలివిగా సినిమాలు చేయడమే కాదు, అంతకన్నా తెలివిగా ప్రమోషన్స్‌ కూడా చేస్తున్నాడు ఈ యంగ్‌ హీరో. విజయ్‌దేవరకొండ నటించిన 'నోటా' విడుదలకు సిద్ధమైంది. ఈ సినిమాని దసరా బరిలో ఉంచాలన్నదే చిత్ర యూనిట్‌ కోరిక. 

ఆల్రెడీ వాళ్లు ఓ క్లారిటీతో ఉన్నారు. అయితే మన విజయ్‌దేవరకొండ విజన్‌ మైండ్‌తో ఆలోచించి ఈ సినిమాకి రిలీజ్‌ డేట్‌ని అభిమానులతో ఫిక్స్‌ చేయించాడు. నోటాను ఎప్పుడు విడుదల చేయాలో మీరే కన్‌ఫామ్‌ చేయండి అంటూ సోషల్‌ మీడియాలో ఓటింగ్‌ పోల్‌ నిర్వహించాడు. అక్టోబర్‌ 5,10, 18 తేదీల్లో ఏ డేట్‌కి 'నోటా' విడుదల చేయాలో ఓటేసి చెప్పండి.. అని విజయ్‌ దేవరకొండ నిర్వహించిన పోలింగ్‌లో అక్టోబర్‌ 5 కే ఎక్కువ ఓట్లు పడ్డాయి. దాంతో ఆ డేట్‌కే 'నోటా' విడుదలవుతోందంటూ విజయ్‌దేవరకొండ తాజాగా ప్రకటించాడు. 

తెలుగుతో పాటు తమిళంలో కూడా ఈ సినిమా విడుదల కానుంది. ఇకపోతే పెద్ద సినిమా అయిన ఎన్టీఆర్‌ 'అరవింద సమేత..' దసరా బరిలో ఉన్న సంగతి తెలిసిందే. అక్టోబర్‌ 11న 'అరవింద సమేత..' ప్రేక్షకుల ముందుకు రానుంది. ఎన్టీఆర్‌ - త్రివిక్రమ్‌ కాంబినేషన్‌లో వస్తున్న ఈ సినిమాపై భారీ అంచనాలున్నాయి. 

విజయ్‌దేవరకొండ చేస్తున్న ప్రమోషన్స్‌ హంగామా చూస్తుంటే, 'అరవింద సమేత..'కు 'నోటా'తో మనోడు గట్టి పోటీ ఇచ్చేలానే ఉన్నాడు.