ఓంకార్‌ దర్శకత్వంలో తెరకెక్కిన 'రాజుగారి గది' సినిమా అశేషంగా ఆకట్టుకుంది. అన్ని వర్గాల వారినీ అలరించింది. హారర్‌ కామెడీ నేపథ్యంలో తెరకెక్కిన ఈ సినిమాని సింప్లీ సూపర్బ్‌గా తెరకెక్కించి, డైరెక్టర్‌గా సక్సెస్‌ అయ్యాడు యాంకర్‌ కమ్‌ డైరెక్టర్‌ ఓంకార్‌. చిన్న హీరోలతో తెరకెక్కించిన ఈ సినిమాకి సీక్వెల్‌లో ఏకంగా నాగార్జున వంటి స్టార్‌ హీరోని ప్రధాన తారాగణంగా పెట్టి సినిమా తీసే ఛాన్స్‌ కొట్టేశాడు. నాగార్జున హీరోగా 'రాజుగారి గది - 2' సినిమా త్వరలోనే ప్రేక్షకుల ముందుకు రానుంది. స్టార్‌ హీరో నాగార్జునే కాదు, స్టార్‌ హీరోయిన్‌ సమంత కూడా నటిస్తోంది ఈ సినిమాలో. అయితే ఇంతటితో ఓంకార్‌ ఆడగట. ఈ సినిమాకి ఇంకా సీక్వెల్స్‌ తీస్తూనే ఉంటాడట. 'రాజుగారి గది' 3, 4.. కూడా ఉండబోతున్నాయని ఓంకార్‌ అంటున్నాడు. అంటే ఈ సినిమాపై ఓంకార్‌ ఎంత కాన్ఫిడెంట్‌గా ఉన్నాడో చూడండి. ఇదేమీ జస్ట్‌ హారర్‌ కామెడీ మూవీనే కాదట. ఓ మంచి మెసేజ్‌ కూడా ఇవ్వబోతున్నాడట ఓంకార్‌ ఈ సినిమాతో. అదేంటో తెరపైనే చూడాలంటున్నాడు ఓంకార్‌. నాగార్జున మెంటలిస్ట్‌ పాత్రలో నటిస్తున్నాడు. ఇంతవరకూ ఆయన నటించని పాత్ర ఇది. అంతేకాదు తొలిసారిగా హారర్‌ బేస్‌డ్‌ సినిమాలో నటిస్తున్నాడు ఈ సినిమాతోనే నాగార్జున. అలాగే సమంత క్యారెక్టర్‌ కూడా చాలా డిఫరెంట్‌గా ఉండబోతోంది. దెయ్యం పాత్రలో నటిస్తోంది సమంత. అయితే తాజాగా విడుదలైన పోస్టర్‌ ఇంట్రెస్ట్‌ క్రియేట్‌ చేస్తోంది. పాఠాలు చెబుతున్న పంతులమ్మ గెటప్‌లో పంచె కట్టుకుని కర్ర పట్టుకుని కనిపిస్తోంది సమంత ఈ పోస్టర్‌లో. ఈ నెల13న ఈ సినిమా ప్రేక్షకుల ముందుకు రానుంది.