బుల్లి తెర నుంచి.. వెండి తెర వైపుకు అడుగులేసిన ఓంకార్.... `జీనియస్`తో ద‌ర్శ‌కుడిగా అవ‌తారం ఎత్తాడు. ఆ సినిమా ఫ్లాప్ అయ్యింది. అయితే రాజుగారి గ‌ది సీక్వెల్స్‌తో కాస్త‌తేరుకున్నాడు. ఇప్పుడు రాజుగారి గ‌ది 3ని ప్రేక్ష‌కుల ముందుకు తీసుకొస్తున్నాడు. జీనియస్ ఫ్లాపుపై ఇంత‌కాలానికి స్పందించాడు ఓంకార్. ఆ సినిమా అవుట్‌పుట్ బాగున్నా - బడ్జెట్ ఎక్కువైపోయింద‌ని, తొలి సినిమా కాబ‌ట్టి అవ‌గాహ‌న లేమితో, భారీగా తీయాల‌న్న ఆలోచ‌న‌తో ఎక్కువ ఖ‌ర్చు పెట్టాన‌ని, అందుకే త‌గిన ఫ‌లితం రాలేద‌ని చెప్పుకొచ్చాడు ఓంకార్.
రాజుగారి గ‌ది 2 కూడా త‌న‌ని కాస్త నిరుత్సాహానికి గురి చేసిందంటున్నాడు ఓంకార్. త‌న సినిమాలో కామెడీ బాగుంటుంద‌ని ఆశించార‌ని, అయితే అది కాస్త త‌గ్గింద‌ని, అందుకే రాజుగారి గ‌ది 3లో వినోదానికే పెద్ద పీట వేశాన‌ని అంటున్నాడు. రాజుగారి గ‌ది సీక్వెల్స్ ఇలా వ‌స్తూనే ఉంటాయ‌ని, అయితే హార‌ర్ సినిమాలే కాకుండా వేరే జోన‌ర్ క‌థ‌లు కూడా సిద్ధం చేస్తున్నాన‌ని, త‌న నుంచి త్వ‌ర‌లోనే ఓ స్పోర్ట్స్ డ్రామా రాబోతోంద‌ని అంటున్నాడీ ఓంకార్ అన్న‌య్య.
