'అజ్ఞాతవాసి' మరో ఆడియో సింగిల్‌ వచ్చేసింది. 'గాలి వాలుగా.. ఓ గులాబి వాలి గాయమైనదే గుండెకి తగిలి..' అంటూ హీరోయిన్‌ కోసం హీరో వర్ణిస్తూ పాడుతూంటే సంగీత ప్రియుల గుండెకు నిజంగానే గులాబి గాయం తగిలినట్లే ఉంది. అనిరుధ్‌ మ్యూజిక్‌లో అనిరుధ్‌ గొంతుతో ఈ పాట అలరించేస్తోంది. 

తొలి ఆడియో సింగిల్‌ని మించిపోయేలా ఉంది ఈ సాంగ్‌లోని ఫీల్‌. త్రివిక్రమ్‌ - పవన్‌ కాంబినేషన్‌లో వచ్చిన 'జల్సా' ఆడియో రికార్డు హిట్‌ కొట్టింది. అలాగే అలాంటి రికార్డుల్నే ఈ ఆడియో క్రియేట్‌ చేసేలా అనిపిస్తోంది. మాంచి మ్యూజిక్‌ టేస్ట్‌ ఉన్న త్రివిక్రమ్‌, పవన్‌ కోసం దగ్గరుండి ఈ సాంగ్స్‌ని ట్యూన్‌ చేయించాడు అనిరుధ్‌ చేత. ఇంతవరకూ అనిరుధ్‌తో సోలో వాయిస్‌ సాంగ్స్‌నే రిలీజ్‌ చేశాడు త్రివిక్రమ్‌. ఈ రెండూ కూల్‌ కూల్‌ అండ్‌ రొమాంటిక్‌ సాంగ్సే. 

అయితే పవన్‌ కళ్యాణ్‌ అంటే జోష్‌. ఆ జోష్‌ ఉన్న సాంగ్స్‌ కోసం ఫ్యాన్స్‌ వెయిట్‌ చేస్తున్నారు. ఈ రెండు పాటల్లోనూ లేడీ వాయిస్‌ వినిపించలేదు. నెక్స్ట్‌ సాంగ్‌లోనైనా లేడీ వాయిస్‌ ఉంటుందేమో చూడాలి మరి. ఈ ఆడియోతోనే అనిరుధ్‌ తెలుగులోకి ఎంట్రీ ఇస్తున్నాడు మ్యూజిక్‌ డైరెక్టర్‌గా. ఫ్రెష్‌ అండ్‌ కూల్‌ సాంగ్స్‌ డిఫరెంట్‌ మ్యూజిక్‌తో టాలీవుడ్‌ ప్రేక్షకులకు పరిచయం చేస్తున్నాడు. 'కొలవెర్రి' పాటతో యూత్‌కి వెర్రి పుట్టించేసిన ఈ కుర్రోడు పవన్‌ కళ్యాణ్‌ సినిమాతో టాలీవుడ్‌కి ఎంట్రీ ఇవ్వడం, తన నెక్ట్స్‌ సినిమా మ్యూజిక్‌ కూడా త్రివిక్రమ్‌ దర్శకత్వంలోనే అందిస్తుండడం విశేషం. 

ఎన్టీఆర్‌ - త్రివిక్రమ్‌ కాంబినేషన్‌లో తెరకెక్కుతోన్న సినిమాకి కూడా అనిరుధ్‌ మ్యూజిక్‌ అందిస్తున్న సంగతి తెలిసిందే. త్వరలోనే ఈ కాంబినేషన్‌ సెట్స్‌ మీదికి వెళ్లనుంది. ఇక 'అజ్ఞాతవాసి' జనవరి 10న ప్రేక్షకుల ముందుకు రానుంది. అనూ ఇమ్మాన్యుయేల్‌, కీర్తి సురేష్‌ హీరోయిన్లుగా నటిస్తున్నారు.