ప‌వ‌న్ క‌ల్యాణ్‌తో క‌ల‌సి గ‌బ్బ‌ర్ సింగ్‌లో సంద‌డి చేసింది శ్రుతిహాసన్. ఆ సినిమా శ్రుతికి స్టార్ హీరోయిన్ స్టేట‌స్‌ని తీసుకొచ్చింది. అయితే ఆ ఊపు ఎంతో కాలం నిల‌వ‌లేదు. వ‌రుస ప‌రాజ‌యాల‌తో శ్రుతి బాగా డౌన్ అయిపోయింది. చివ‌రికి అవ‌కాశాల కోసం ఎదురు చూసే స్థాయికి ప‌డిపోయింది. కాట‌మ‌రాయుడు సినిమాతో ప‌వ‌న్ తో మ‌ళ్లీ జోడీ క‌ట్టినా, ఆ సినిమా ఆమెకు బ్రేక్ ఇవ్వ‌లేక‌పోయింది.
ఇప్పుడు శ్రుతి హాస‌న్‌ని అంతా మ‌ర్చిపోయారు కూడా. ర‌వితేజ క్రాక్‌లో ఆమె న‌టిస్తున్నా, ఆసినిమాకి పెద్ద‌గా హైప్ లేకుండా పోయింది. ఈద‌శ‌లో శ్రుతిని ప‌వ‌న్ మ‌రోసారి ఆదుకోబోతున్న‌ట్టు భోగ‌ట్టా. ప‌వ‌న్ క‌ల్యాణ్ కొత్త చిత్రం 'వ‌కీల్ సాబ్‌' లో శ్రుతికి అవ‌కాశం ద‌క్కింద‌ని టాక్‌. ఈ సినిమాలో ప‌వ‌న్ ప‌క్క‌న ఓ క‌థానాయిక కావాలి. ఆమె కోసం ఎవ‌రిని తీసుకోవాలో తెలీక చిత్ర‌బృందం త‌ర్జ‌న భ‌ర్జ‌న‌లు ప‌డుతోంది. ప‌వ‌న్ ఫ్లాష్ బ్యాక్‌లో వ‌చ్చే పాత్ర ఇది. చాలా ప్రాముఖ్యం ఉంది. ఈ పాత్ర కోసం శ్రుతిహాసన్ పేరుని ప‌వ‌న్ సూచించాడ‌ట. ప‌వ‌న్ చెబితే ఇక తిరుగేముంది? శ్రుతికి బెర్తు ఖాయ‌మైన‌ట్టే. మ‌రి ఈ సినిమాతోనైనా శ్రుతికి బ్రేక్ వ‌స్తుందేమో చూడాలి.
