జూన్ నుంచి షూటింగులు మొద‌లైపోతున్నాయి. అప్పుడే ద‌ర్శ‌క నిర్మాత‌లు కొత్త షెడ్యూల్స్ వేసేసుకుంటున్నారు. కానీ కొంత‌మంది అగ్ర హీరోలు క‌రోనా టైమ్‌లో షూటింగులంటే భ‌య‌ప‌డుతున్నారు. `ఇంకొన్ని రోజులు వేచి చూద్దాం` అనే ధోర‌ణిలో ఉన్నారు. కానీ పవన్ క‌ల్యాణ్ మాత్రం ఒకేసారి రెండు సినిమాల‌కు గ్రీన్‌సిగ్న‌ల్ ఇచ్చేశాడు.రెండు సినిమాల‌కూ ఒకేసారి కాల్షీట్లు పంచేశారు.
`వ‌కీల్ సాబ్‌`లో పవన్ న‌టిస్తున్న సంగ‌తి తెలిసిందే. దాదాపు 70 శాతం షూటింగ్ అయిపోయింది. జూన్‌లో షూటింగులు ప్రారంభ‌మైన వెంట‌నే... ఈ సినిమాని ప‌ట్టాలెక్కించేస్తారు. పవన్ డైరీలో జూన్ కాల్షీట్లు అన్నీ ఈ సినిమాకే. జులై మాత్రం క్రిష్ సినిమాకి ఇచ్చాడు. క్రిష్ - పవన్ కాంబినేష‌న్‌లో ఓ సినిమా తెరకెక్కుతున్న సంగ‌తి తెలిసిందే. మొఘ‌ల్ సామ్రాజ్యం నేప‌థ్యంలో సాగే క‌థ ఇది. ఇప్ప‌టికే హైద‌రాబాద్ లోని రామోజీ ఫిల్మ్‌సిటీలో ఈ సినిమాకోసం భారీ సెట్లు నిర్మించారు. ఆ సెట్లోనే పవన్ సినిమా షూటింగ్ మొత్తం జ‌ర‌గ‌బోతోంది. జూన్‌లో క్రిష్ సినిమా మొద‌లైనా, పవన్ కోసం జులై వ‌ర‌కూ ఆగుతారు. జులై - ఆగ‌స్టుల మొత్తం క్రిష్ సినిమాతోనే గ‌డ‌ప‌బోతున్నాడు పవన్. వీలైనంత త్వ‌ర‌గా ఈ సినిమానీ పూర్తి చేసి 2021 ప్రారంభంలో హ‌రీష్ శంక‌ర్ సినిమాని ప‌ట్టాలెక్కించాల‌నుకుంటున్నాడు. సో.. ఇక మీద‌ట పవన్ సినిమాల గురించి క‌బుర్లే క‌బుర్లు.
