ప‌వ‌న్ క‌ల్యాణ్ మ‌ళ్లీ మేక‌ప్ వేసుకోవ‌డం ఖాయమైపోయింది. ఓప‌క్క పింక్ రీమేక్ ప‌నులూ, మ‌రోవైపు క్రిష్ సినిమాకి సంబంధించిన ప్రీ ప్రొడ‌క్ష‌న్ వ‌ర్క్ చ‌క చ‌క జ‌రిగిపోతున్నాయి. పింక్ చిత్రానికి వేణు శ్రీ‌రామ్ ద‌ర్శ‌క‌త్వం వ‌హించ‌నున్నారు. ఇప్పుడు క‌థానాయిక కూడా దాదాపుగా ఫిక్స్ అయిపోయిన‌ట్టే. ఈ చిత్రంలో క‌థానాయిక‌గా పూజా హెగ్డే న‌టించ‌బోతోంద‌ని తెలుస్తోంది. `పింక్` లో తాప్సి చేసిన పాత్ర‌లో ఇక్క‌డ పూజా క‌నిపిస్తుంద‌న్న‌మాట. ప‌వ‌న్ ప‌క్క‌న డ్యూయెట్లు పాడే సినిమా కాదిది. కాక‌పోతే... ప‌వ‌న్ సినిమాలో ఛాన్సు దొర‌క‌డం పూజాకు జాక్ పాట్ కొట్టిన‌ట్టైంది.
ఎందుకంటే ఇప్ప‌టి వ‌ర‌కూ ఎన్టీఆర్‌, మహేష్, అల్లు అర్జున్, ప్ర‌భాస్ లాంటి అగ్ర క‌థానాయ‌కులంద‌రితోనూ న‌టించింది. ఇప్పుడు ప‌వ‌న్ సినిమాలోనూ న‌టిస్తే... ఓ స‌ర్కిల్ పూర్తియిన ఫీలింగ్ వ‌స్తుంది. పైగా అభిన‌యం ప్ర‌ద‌ర్శించ‌డానికి మంచి స్కోప్ ఉంది. `పింక్`లో అమితాబ్ బ‌చ్చ‌న్ లాంటి మేటి స్టార్లు ఉన్నా, తాప్సికి మంచి పేరొచ్చింది. ఓ ర‌కంగా త‌న‌లోని న‌టిని నిరూపించుకోవ‌డానికి పూజాకు దొరికిన అవ‌కాశం అనుకోవాలి.
