'సాహో' సినిమాకి డిజాస్టర్‌ టాక్‌ వచ్చినా.. అందర్నీ విస్మయ పరిచే స్థాయిలో వసూళ్లను సాధించింది. అయినాగానీ, ఆ సినిమా బయ్యర్లకు నష్టాల్ని మిగిల్చిందనుకోండి.. అది వేరే విషయం. ఆ సంగతి పక్కన పెడితే, ప్రభాస్‌ తన తాజా చిత్రం 'జాన్‌' (వర్కింగ్‌ టైటిల్‌) అప్‌డేట్‌ రేపు ఇవ్వబోతున్నాడన్న వార్త ఒక్కసారిగా రెబల్‌ స్టార్‌ అభిమానుల్లో కొత్త ఉత్సాహాన్ని తీసుకొచ్చింది. నిజానికి ప్రభాస్‌ అభిమానులు, ఈ సంక్రాంతికే సర్‌ప్రైజ్‌ని ఆశించారు. అయితే, మేకర్స్‌ కాస్త ఆచి తూచి వ్యవహరించినట్లున్నారు అప్‌డేట్‌ని విడుదల చేయడంలో.
రేపు ఈ సినిమా అప్‌డేట్‌ రాబోతోంది. అదేంటి.? అన్నది ప్రస్తుతానికి సస్పెన్సే. టైటిల్‌ విడుదల చేస్తారని కొందరు.. కాదు కాదు, టైటిల్‌తోపాటు హీరో హీరోయిన్లతో ఓ పోస్టర్‌ రిలీజ్‌ అవుతుందని మరికొందరు.. ఇలా రకరకాల ఊహాగానాలు ప్రచారంలోకి వచ్చాయి. ప్రభాస్‌ హీరోగా నటిస్తోన్న ఈ సినిమాలో పూజా హెగ్దే హీరోయిన్‌గా చేస్తోన్న విషయం విదితమే. 'జిల్‌' ఫేమ్‌ రాధాకృష్ణ ఈ చిత్రానికి దర్శకుడు. తొలుత 'సాహో' స్థాయిలోనే భారీ బడ్జెట్‌తో ప్లాన్‌ చేసినా.. ఆ తర్వాత కొన్ని మార్పులు చేసి.. బడ్జెట్‌ని గణనీయంగా తగ్గించినట్లు 'జాన్‌' సినిమా విషయమై ప్రచారం జరుగుతోంది. అయితే, చిత్ర యూనిట్‌ వర్గాలు మాత్రం.. ఎక్కడా ఏ విషయంలోనూ రాజీ పడలేదని అంటున్నాయి. మొత్తమ్మీద, ప్రభాస్‌ కొత్త సినిమా అప్‌డేట్‌కి సంబంధించిన న్యూస్‌.. ఇప్పుడు సోషల్‌ మీడియాలో వైరల్‌గా మారింది. వేల కొద్దీ ట్వీట్లు కన్పిస్తున్నాయి ప్రభాస్‌ అభిమానుల నుంచి. అదీ ప్రభాస్‌ స్టామినా అంటే.!
