ఏ మూవీ రిలీజ్ అయినా, అది హిట్ అయినా ఫట్ అయినా మొదట కలెక్షన్స్ గురించి చర్చ జరుగుతుంది. అసలు ముందు నుంచే ఓవర్సీస్ రైట్స్ ఎంతకి అమ్ముడయ్యాయి, నైజాం, ఆంధ్రా కొనుగోళ్లు, శాటిలైట్ రైట్స్ అని లెక్కలు వేస్తున్నారు. రిలీజ్ అయ్యాక ఏ ఏరియాలో ఎంత కలెక్ట్ చేసింది? ఏ మూవీ రికార్డులను బ్రేక్ చేసింది? అన్న విషయాలపై ఫ్యాన్స్ చర్చలు పెడుతున్నారు. రీసెంట్ గా రిలీజ్ అయిన ప్రభాస్ మూవీ ‘సలార్’ కూడా అంతే. మూవీ టాక్ గూర్చి తప్ప కలెక్షన్స్ గూర్చి ఎక్కువ చర్చ నడుస్తోంది.
కేజీఎఫ్ తో క్రేజ్ తెచ్చుకున్న ప్రశాంత్ నీల్ దర్శకత్వంలో ప్రభాస్, పృథ్విరాజ్ సుకుమారన్, శృతి హాసన్ కలిసి నటించిన,‘సలార్’ డిసెంబర్ 22న ప్రేక్షకుల ముందుకు వచ్చింది. మొదటి రోజు నుంచే హిట్ టాక్ తో కలక్షన్ల సునామీ సృష్టిస్తోంది. ‘సలార్’ దేశవ్యాప్తంగా 318 కోట్లు, ప్రపంచవ్యాప్తంగా 550 కోట్లు కలెక్ట్ చేసిందని టాక్. ‘సలార్’కు తెలుగులోనే ఎక్కువ కలక్షన్స్ వచ్చాయి. వారం తరువాత కూడా సలార్ కి తెలుగు రాష్ట్రాల్లో ఆక్యూపెన్సీ ఉండటం గమనార్హం. న్యూ ఇయర్, వీకెండ్‌లో మళ్లీ సలార్ కలక్షన్లు పెరిగే అవకాశముందని ఇండస్ట్రీ నిపుణుల అంచనా.
