సలార్, ఆదిపురుష్, ప్రాజెక్ట్ కె లాంటి లార్జర్ దెన్ లైఫ్ సినిమాలు చేస్తున్న ప్రభాస్.. మారుతి లాంటి మీడియం రేంజ్ దర్శకుడితో ఒక సినిమా చేయడం అందరినీ సర్ప్రైజ్ చేసింది. టి.జి.విశ్వప్రసాద్‌ నిర్మిస్తున్న ఈ సినిమా ఇటీవల పూజా కార్యక్రమాలు కూడా పూర్తి చేసుకుంది. తాజాగా ఈ సినిమా గురించి ఒక ఆసక్తికరమైన అంశం తెలిసింది. ఇందులో ప్రభాస్ ద్విపాత్రాభినయం చేస్తారని టాక్‌.
హారర్‌ కామెడీ నేపథ్యంలో మారుతీ దీన్ని తీర్చిదిద్దనున్నారు. తాత-మనవళ్లుగా రెండు పాత్రల్లోనూ ప్రభాసే నటించనున్నారని సమాచారం. ఈ కథ కూడా తాత-మనవళ్లు మధ్య జరుగుతుందట. డబుల్ యాక్షన్ లో ప్రభాస్ కి మంచి ట్రాక్ రికార్డ్ వుంది. బిల్లా, బాహుబలి చిత్రాల్లో డబుల్ యాక్షన్ లో కనిపించారు. ఈ రెండూ పెద్ద విజయాలే. ఇప్పుడు మారుతి సినిమాలో కూడా డబుల్ యాక్షన్ కావడం విశేషం. అలాగే ఇందులో ప్రభాస్‌కి జోడీగా ముగ్గురు కథానాయికలు నటిస్తారని తెలుస్తోంది. త్వరలోనే సినిమా సెట్స్‌పైకి వెళ్లనుంది. ఈ చిత్రానికి సూపర్ డీలక్స్ అనే టైటిల్ పరిశీలనలో వుంది.
