చిన్న సినిమా 'ఊహలు గుసగుసలాడే' చిత్రంతో మొదలైన తన సినీ ప్రయాణం ఓ మోస్తరు హీరోల దాకా కొనసాగింది ముద్దుగుమ్మ రాశీఖన్నాకి. స్టార్‌డమ్‌ వస్తున్న టైంలో రేసులో కొంచెం వెనకబడింది. మళ్లీ ఇప్పుడు రేసులోకి దూసుకొస్తున్నట్లే అనిపిస్తోంది. మెగా హీరో, మెగా మేనల్లుడు అయిన సాయి ధరమ్‌తేజ్‌తో 'సుప్రీమ్‌' సినిమాలో నటించిన సూపర్‌ హిట్‌ కొట్టింది.  

తాజాగా ఇప్పుడు రెండు సినిమాలతో ప్రేక్షకుల్ని కనువిందు చేయనుంది. రవితేజ హీరోగా తెరకెక్కుతోన్న మాస్‌ ఎంటర్‌టైనర్‌ 'టచ్‌ చేసి చూడు'లో రాశీఖన్నా హీరోయిన్‌గా నటిస్తోంది. ఈ సినిమాలో గ్లామర్‌ పరంగా రాశీఖన్నా రెచ్చిపోయి నటించిందట. అలాగే పర్‌ఫామెన్స్‌తోనూ ఆకట్టుకుంటానంటోంది. గతంలో రవితేజతో 'బెంగాల్‌ టైగర్‌' చిత్రంలోనూ రాశీఖన్నా గ్లామర్‌తో పిచ్చెక్కించేసింది. బికినీ అందాలతో కుర్రకారును బోల్తా కొట్టించేసింది. అంతకు మించిన గ్లామరస్‌ లుక్‌తో ఈ సినిమాలో కనిపించనుందనీ టాక్‌ వినిపిస్తోంది. 

'బెంగాల్‌ టైగర్‌'లో అమ్మడు మిల్కీ బ్యూటీ తమన్నాతో పోటీ పడింది గ్లామర్‌లో. ఈ సినిమా విషయానికి వచ్చే సరికి హాట్‌బ్యూటీ సీరత్‌కపూర్‌తో గ్లామర్‌ పోటీకి దిగనుందట. విక్రమ్‌ సిరికొండ దర్శకత్వంలో తెరకెక్కిన ఈ సినిమా ఫిబ్రవరి 2న ప్రేక్షకుల ముందుకు రానుంది. మరో వైపు మెగా ప్రిన్స్‌తో 'తొలిప్రేమ' సినిమాలో నటిస్తోంది. 'టచ్‌ చేసి చూడు' మాస్‌ ఎంటర్‌టైనర్‌ కాగా, 'తొలిప్రేమ' క్లాస్‌ మూవీ. ఈ సినిమాలో రాశీ డిఫరెంట్‌ లుక్‌లో కనిపిస్తోంది. డిఫరెంట్‌ హెయిర్‌ స్టైల్‌తో క్యూట్‌గా కొంచెం హాటీగా కనిపిస్తోంది. 

వరుణ్‌తేజ్‌, రాశీఖన్నా జంట బాగుందంటూ విమర్శలు వస్తున్నాయి ప్రోమోస్‌ చూస్తుంటే. గ్లామర్‌తో పాటు పర్‌ఫామెన్స్‌కీ బాగా స్కోపున్న పాత్రలో రాశీ కనిపించనుంది 'తొలిప్రేమ'లో. వెంకీ అట్లూరి దర్శకత్వంలో తెరకెక్కిన ఈ సినిమా ఫిబ్రవరి 9న విడుదల కానుంది.