'టచ్‌ చేసి చూడు' సినిమాతో తాజాగా ప్రేక్షకుల ముందుకు వచ్చింది ముద్దుగుమ్మ రాశీఖన్నా. అయితే ఈ సినిమా ఆశించిన స్థాయిలో విజయాన్ని నమోదు చేయలేకపోయింది. దాంతో ఈ ముద్దుగుమ్మ తదుపరి రాబోతున్న 'తొలిప్రేమ' సినిమాతోనే తానేంటో ప్రూవ్‌ చేసుకోవాల్సి ఉంది. గ్లామర్‌ పోటీ ఎక్కువగా ఉందీ భామకిప్పుడు. 

ఎందుకంటే ఒక్క రోజు ముందుగా ముద్దుగుమ్మ లావణ్య త్రిపాఠి వచ్చేస్తోంది 'ఇంటెలిజెంట్‌' సినిమాతో. ఇది పక్కా మాస్‌ మసాలా ఎంటర్‌టైనర్‌. ఇప్పటికే గ్లామర్‌లో లావణ్య ఫుల్‌ మార్కులేయించేసుకుంటోంది ఈ సినిమా ప్రోమోస్‌ ద్వారా. పోస్టర్‌ స్టిల్స్‌లో లావణ్య గ్లామర్‌ కాక రేపేస్తోంది. అలాంటిది ఈ తరుణంలో ఓ పక్క రాశీఖన్నా, లావణ్య త్రిపాఠితో గ్లామర్‌లో పోటీపడాలి. మరో పక్క పర్‌ఫామెన్స్‌ పరంగానూ పోటీ పడాల్సి ఉంటుంది. అందుకే 'తొలిప్రేమ' సినిమాలో తన పాత్రకు ప్రాధాన్యత బాగా ఉందని అంటోంది రాశీఖన్నా. అలాగే గ్లామర్‌ కూడా చెప్పుకోదగ్గ స్థాయిలోనే ఉండబోతోందట. 

సినిమాకి ప్రీ రిలీజ్‌ బజ్‌ కూడా బావుంది. క్లాస్‌ మూవీనే అయినా ఉండాల్సిన కమర్షియల్‌ అంశాలన్నీ 'తొలిప్రేమ'లో ఉంటాయట. ఈ సినిమాలో తన గెటప్‌ కూడా చాలా కొత్తగా ఉండబోతోందని చెబుతోంది రాశీఖన్నా. ఏది ఏమైనా సినిమా విడుదలైతే కానీ రిజల్ట్‌ ఎలా ఉండబోతోందనేది తెలీదు. మరో పక్క ఈ బ్యూటీ తమిళంలోనూ సత్తా చాటుతోంది. తమిళంలో మూడు సినిమాలకు పైగానే కమిట్‌ అయ్యింది అందాల రాశీఖన్నా.