'బాహుబలి ది కన్‌క్లూజన్‌' సినిమా తర్వాత రాజమౌళి తన నెక్స్ట్‌ సినిమాపై క్లారిటీ ఇచ్చేసిన సంగతి తెలిసిందే. అదీ ఓ మల్టీస్టారర్‌ కావడం విశేషం. బిగ్‌ మల్టీ స్టారర్‌. మెగా పవర్‌స్టార్‌ రామ్‌చరణ్‌, యంగ్‌ టైగర్‌ ఎన్టీఆర్‌ కాంబినేషన్‌లో రాబోతున్న ఆ మెగా మల్టీస్టారర్‌కి కథ సిద్ధమైందనీ సమాచారమ్‌. కొద్ది రోజుల క్రితమే ఎన్టీఆర్‌కీ, చరణ్‌కీ విడివిడిగా కథ వినిపించాడట రాజమౌళి. అయితే ఇద్దర్నీ ఒకేసారి కూర్చోబెట్టి కథ చెప్పాలని రాజమౌళి అనుకుంటున్నాడట. అయితే ఇదంతా జస్ట్‌ రాజమౌళి శాటిస్‌ఫై కోసమే కానీ రాజమౌళి ఏం చెప్పినా కాదనే అవకాశం వీరిద్దరి విషయంలోనూ లేదు.

చరణ్‌కైనా ఎన్టీఆర్‌కైనా జక్కన్న అంటే అంత గౌరవం. చరణ్‌కి కెరీర్‌లో బిగ్గెస్ట్‌ హిట్‌ని రాజమౌళి 'మగధీర' రూపంలో అందించేశాడు. ఎన్టీఆర్‌, జక్కన్నతో మూడు సినిమాలు చేశాడు. 'స్టూడెంట్‌ నెంబర్‌ 1', 'సింహాద్రి', 'యమదొంగ' వంటి సూపర్‌ హిట్‌ చిత్రాలు చేశాడు ఎన్టీఆర్‌, జక్కన్నతో. అయితే ఇప్పుడు ఈ ఇద్దరితో చేయబోతున్న ఆ మెగా మల్టీ స్టారర్‌ కథేంటనే విషయంపై ఇటు మెగా అభిమానుల్లోనూ, అటు ఎన్టీఆర్‌ అభిమానుల్లోనూ ఆశక్తి నెలకొంది. ఈ ప్రాజెక్ట్‌కి కథనందించింది ది గ్రేట్‌ విజయేంద్ర ప్రసాద్‌. ఎన్నో విజయవంతమైన కథలను అందించిన అనుభవం ఈయనకుంది.

ఇలాంటి గొప్ప మల్టీస్టారర్‌కి ఈయన అందించే కథ ఎలా ఉండబోతోందో చూడాలి మరి. త్వరలోనే ఈ సినిమాకి సంబంధించి, మరిన్ని తాజా అప్‌డేట్స్‌ జక్కన్న నుండే స్వయంగా రానున్నాయనీ తెలుస్తోంది. అంతవరకూ ఎదురు చూడక తప్పదు. ప్రస్తుతం చరణ్‌ 'రంగస్థలం' విడుదలకు సిధ్దంగా ఉంది. బోయపాటితో సినిమా సెట్స్‌ మీద ఉంది. మరో పక్క ఎన్టీఆర్‌, త్రివిక్రమ్‌తో చేయబోయే కొత్త సినిమా మరికొద్ది రోజుల్లో పట్టాలెక్కనుంది.