జక్కన్న రాజమౌళి ఇప్పటికైతే మౌనం దాల్చాడు తన తదుపరి సినిమా విషయంలో. రామ్‌చరణ్‌, ఎన్టీఆర్‌ కాంబినేషన్‌లో రాజమౌళి ఓ సినిమా చేస్తాడనే ప్రచారం జరుగుతోంది. బ్యానర్‌ కూడా కన్‌ఫామ్‌ అయ్యింది. కానీ సినిమాని ఫైనలైజ్‌ చెయ్యాల్సింది రాజమౌళి కాబట్టి, ఆయన స్పందించే వరకూ సినిమా చుట్టూ గాసిప్స్‌ కుప్పలు తెప్పలుగా వినిపిస్తూనే ఉంటాయి. 

ఫలానా హీరోయిన్‌ అట, ఫలానా బడ్జెట్‌ అట అంటూ వచ్చే గాసిప్స్‌కి ఆకాశమే హద్దు అయిపోయింది. 'బాహుబలి' సినిమాకి 1500 కోట్లకు పైగా వసూళ్ళు రావడం ఓ సంచలనమైతే, రాజమౌళి దర్శకత్వంలో చరణ్‌ - ఎన్టీఆర్‌ హీరోలుగా నటించబోయే సినిమాలపై వస్తున్న గాసిప్స్‌ ఇంకో సంచలనం అన్నట్టుంది. కట్టప్ప బాహుబలిని ఎందుకు చంపాడనే క్వశ్చన్‌తో 'బాహుబలి-2'పై అంచనాల్ని పెంచేశాడు రాజమౌళి. ఇప్పుడు చరణ్‌ - ఎన్టీఆర్‌ సినిమా గాసిప్‌తోనూ అంతే అంచనాల్ని ఈ ప్రాజెక్ట్‌పై పెంచేస్తున్నాడు. 

'బాహుబలి' లాంటి సినిమానా? లేదంటే ఇది సాధారణ కమర్షియల్‌ సినిమానా? అనేది తెలియడంలేదు. ఏం తెలియాలన్నా రాజమౌళి పెదవి విప్పాల్సిందే. ఆయనేమో ఈ సినిమా గురించి ఎవరన్నా ప్రశ్నిస్తే, 'నవ్వి' ఊరుకుంటున్నాడు. చరణ్‌తో 'మగధీర' సినిమా తీసిన రాజమౌళి, ఎన్టీఆర్‌తో అయితే ఏకంగా మూడు సినిమాలు చేసేశాడు. 'స్టూడెంట్‌ నెంబర్‌1', 'యమదొంగ', 'సింహాద్రి' ఆ మూడు సినిమాలు. ఈ మూడూ సూపర్‌ హిట్‌ చిత్రాలే. చరణ్‌తో తీసిన 'మగధీర' ఆ సమయంలో ఇండస్ట్రీ రికార్డ్‌. ఎన్టీఆర్‌తో తీసిన 'సింహాద్రి' కూడా అంతే. 

అందుకే ఈ కాంబినేషన్‌పై అంత క్రేజ్‌. రాశి ఖన్నా ఈ సినిమాలో హీరోయిన్‌గా నటిస్తోందనే గాసిప్‌ బయటకు వచ్చింది. అంతకన్నా ముందు కాజల్‌ని హీరోయిన్‌గా తీసుకొస్తున్నారని మరో గాసిప్‌ వచ్చింది. ఏది నిజమో, రాజమౌళికే తెలియాలి.