యాంగ్రీ యంగ్‌మ్యాన్‌గా పేరున్న రాజశేఖర్‌కి విలన్‌గా నటించాలన్న కోరిక ఎప్పటి నుండో ఉందట. ఈ మధ్య ఆ కోరిక మరింత బలపడినట్లు ఆయన మాటల్లోనే అర్ధమవుతోంది. చిరంజీవి సినిమాలో విలన్‌గా నటించాలనుందని గతంలో రాజశేఖర్‌ చెప్పారు. 

'ఖైదీనెం 150' టైంలోనే ఆ ఛాన్స్‌ మిస్‌ చేసుకున్నాననీ రాజశేఖర్‌ అన్నారు. అలాగే బాలయ్య చిత్రంలో కూడా. బాలయ్య అందుకు సై అన్నారు కూడా. అవకాశం వస్తే, తన సినిమాలో విలన్‌గా ఛాన్సిస్తాననీ బాలయ్య, రాజశేఖర్‌కి మాటివ్వడం కూడా జరిగింది. అయితే ఇప్పుడు చిరంజీవి, బాలయ్య వీరిద్దరూ కాదు. వీరి నెక్స్ట్‌ జనరేషన్‌ అయిన చరణ్‌, ఎన్టీఆర్‌ సినిమాలో రాజశేఖర్‌ విలన్‌గా నటించే బంపర్‌ ఛాన్స్‌ కొట్టేశాడనీ తాజా సమాచారమ్‌. 

రాజమౌళి, రామ్‌చరణ్‌, ఎన్టీఆర్‌ కాంబినేషన్‌లో బిగ్‌ మల్టీ స్టారర్‌ తెరకెక్కుతోన్న సంగతి తెలిసిందే. ఈ కాంబినేషన్‌ని 'ఆర్‌ ఆర్‌ ఆర్‌' అంటూ ముద్దుగా పిలుచుకుంటున్నారు. ఈ సినిమాతోనే రాజశేఖర్‌ విలన్‌గా మారబోతున్నాడనీ తెలియవస్తోంది. ఆల్రెడీ రాజమౌళి, రాజశేఖర్‌తో సంప్రదింపులు జరిపారట. ఈ ఆఫర్‌కి రాజశేఖర్‌ వెంటనే ఓకే చెప్పేశారట. ఒకవేళ ఇదే జరిగితే, తండ్రులతో నెరవేరని రాజశేఖర్‌ కోరిక, కొడుకులతో నెరవేరబోతోందన్న మాటే. 

ఇటీవలే హీరోగా లాంగ్‌ గ్యాప్‌ తర్వాత రాజశేఖర్‌ 'గరుడవేగ' సినిమాతో సూపర్‌ హిట్‌ కొట్టాడు. అలాగే ఈ బిగ్‌ ప్రాజెక్ట్‌లో భాగస్వామి అయితే రాజశేఖర్‌ కెరీర్‌కి ఇకపై డోకా ఉండబోదనే చెప్పాలి.