మొన్నేమో 400 కోట్లు కొల్లగొట్టేసిందనే ప్రకటన.. తాజాగా 500 కోట్లు వసూలు చేసిందనే ప్రకటన.. రేపో మాపో 600 కోట్లు, ఆ పైన వసూలు చేసిందంటూ రాబోయే ప్రకటన.. వెరసి, '2.0' పబ్లిసిటీ అదరగొట్టేస్తున్నారు. పబ్లిసిటీ స్టంట్స్ సంగతి పక్కన పెడితే, '2.0' సినిమా గట్టెక్కుతుందా.? లేదా.? అనేదానిపై కొంత గందరగోళం ఇంకా అలాగే వుంది. ఎందుకంటే ఈ సినిమా కోసం 600 కోట్లు ఖర్చు చేసినట్లు స్వయంగా హీరో రజనీకాంత్ ప్రకటించాడు.
600 కోట్లు ఖర్చు చేస్తే, ఎంత మొత్తంలో సొమ్ములు తిరిగి రావాలట.? ఖర్చు విషయంలో రజనీకాంత్ కొంత 'అతి' ప్రదర్శించి వుండొచ్చు. అలాగే వస్తున్న వసూళ్ళ విషయంలోనూ ఆ 'అతి' వుంటుంది. దుబాయ్లో సినిమా ప్రమోషన్ కనీ వినీ ఎరుగని రీతిలో చేయడం.. అలాగే, సినిమా కోసం గ్రాఫిక్స్ ఓ రేంజ్లో వాడేయడం, వీటన్నిటికీ మించి సినిమా నిర్మాణం కోసం ఎక్కువ సమయం తీసుకోవడం వంటివన్నీ పరిగణనలోకి తీసుకుంటే '2.0' గట్టెక్కడం అంత తేలిక కాదు.
తెలుగులో ఇప్పటికే ఈ సినిమా 40 కోట్ల మార్క్ దాటినప్పటికీ, ఆశించిన స్థాయిలో లాభాలు వస్తాయా? అనేదానిపై భిన్నాభిప్రాయాలు వ్యక్తమవుతున్నాయి. చైనాలో 50 వేల థియేటర్లలో విడుదల.. అంటూ ఓ ప్రకటన రావడం, సినిమా గురించి ఎప్పటికప్పుడు ప్రచారం కొత్త పుంతలు తొక్కిస్తుండడం ఇవేవీ సినిమాని గట్టెక్కించేలా మాత్రం కన్పించడంలేదన్నది నిర్వివాదాంశం.