బోల్డ్ క్యారెక్ట‌ర్ చేయ‌డానికి బోలెడంత ధైర్యం ఉండాలి. మ‌రీ ముఖ్యంగా హీరోయిన్ల‌కు. ఏమాత్రం తేడా చేసినా - వ్యాంప్ ముద్ర ప‌డిపోతుంది. అందులోంచి బ‌య‌ట‌కు రావ‌డం మ‌రింత క‌ష్టం అవుతుంది. అందుకే ఆ త‌ర‌హా పాత్ర‌లంటే ఆచి తూచి స్పందిస్తుంటారు. పాత్ర కోసం మందు కొట్ట‌డం, ద‌మ్ములాగ‌డం క‌థానాయిక‌ల‌కు అప్పుడ‌ప్పుడూ త‌ప్ప‌ని అంశాలు. అయితే మ‌హిళా సంఘాల నుంచి తీవ్ర మైన ప్ర‌తిస్పంద‌న ఎదుర్కోవాల్సివ‌స్తుంటుంది.
ఆ విమ‌ర్శ‌ల్ని సైతం త‌ట్టుకొని క‌థానాయిక‌లు ధైర్యం చేస్తుంటారు. రకుల్ ఇప్పుడు అదే చేసింది రకుల్ క‌థానాయిక‌గా న‌టించిన చిత్రం `మ‌న్మ‌థుడు 2`. ఇందులో అవంతిక‌గా క‌నిపించ‌బోతోంది రకుల్. ఈ సినిమాకి సంబంధించిన ఓ టీజ‌ర్ ఇప్పుడు విడుద‌లైంది. అవంతిక పాత్ర‌ని ప‌రిచ‌యం చేసే టీజ‌ర్ అది. అందులో అవంతిక ఎలా ఉంటుంది? ఏం చేస్తుంటుంది? అనే విష‌యాల్ని చెప్పేశారు.
పైకి ప‌ద్ధ‌తిగా క‌నిపించే `ఏ` స‌ర్టిఫికెట్ అమ్మాయిలాంటి పాత్ర అది. చివ‌రి షాట్‌లో సిగ‌రెట్ తాగ‌డం కూడా చూపించారు. సినిమాలో అవంతిక పాత్ర మ‌రింత విజృంభిస్తుంద‌ట. రకుల్ సిగ‌రెట్ తాగే సీన్ చేయ‌డం ఇదే తొలిసారి. మ‌రి.. సినిమాలో ఇంకెంత ముందుకెళ్లిందో చూడాలి.
